Wendekarêde sinifa 2. ya Lîseyêda Mersînî Ferhat Sabah, seba ke Facebook ser o qaşo “parekerdişo rêxistinkî” kerd, hetê dadgerîye ra sey endamê rêxistine name bî û erzîyayo hepisxane.
Wendekarê lîse yo 16serre Ferhat Sabah, hewteyo verên hetê polîsî ra ame girewtene binê nezaretî. O ra dime bi sucdarkerdişê “endambîyayîşê rêxisine” û “propagandaya rêxistine” ame berdene hepisxane. Goreyê îdîayanê dadgerîye Sabahî keyepelê Facebookî ser o propagandayê rêxistine kerdo û kokteylê molotofî eştî banê karê xo. Sabahî nê îdîayî qebul nêkerd, va ke hesabê Facebookî yê ey nîyo.
Herçiqas ke hîna 16 serrî der o, Sabah ame rusnayene bi hepisxaneyê Mersînî yo cadaye yê tîpê E. Tewqîfkerdişê Ferhat Sabahî hetê keye û organîzasyonanê kurdan ra protesto bî.
