Seba ke potansîyelê turîzmî yê Dîyarbekirî bikero zêde, Serekîya Dayîreyê Kultur û Turîzmî ya Şaredarîya Şaristanê Girsî yê Dîyarbekirî “Rayberê Gêrayîşî (Cêrayîşî) yê Dîyarbekirî” bi kurdkî, tirkî, îngilzkî û erebkî kerd hazir. Kurdî kî bi hîrê lehçeyî kurmanckî (kirdaskî), kirmanckî (zazakî) û sorankî ameye hazir kerdene. Rayberê gêrayîşî ra 11.000 teneyî çap bîyê, aye ra kî dot 63.000 teneyî kartpostalî amade bîy.
Goreyê vatena serekê dayîreyê kultur û turîzmî Muharrem Cebeyî, na reya verên a ke xebatêda nîyanêne ameye amade kerdene. Rayberê Gêrayîşî de pêro qezayanê Dîyarbekirî ra resimê kalîteyinî, melumatê tarîxî, xususîyetanê kultur, şar û mitbaxa Dîyarbekirî ûsn. ca girewto.
Rayberê Gêrayîşî ra 1.000 hebî bi kirmanckî, 3.000 hebî bi kurmanckî (kirdaskî), 1.000 hebî bi sorankî, 3.000 hebî bi tirkî, 1.000 hebî bi erebkî û 2.000 hebî bi îngilizkî amey çap kerdene. Rayber paket de yeno rotene (10 TL), zereyê her paketî de kî 21 hebî kartpostal û 4 zonan (ziwanan) de kî hîrê broşurê cîya-cîyayî derheqê dengbêj, camî û dêranê Dîyarbekirî de estê. Rayber hetê şaredarîya şaristanê girsî ra fînanse bîyo.
