Qetlîamê Parîsî ser o di hewteyî vêrdî ra. Wexto ke kurdî hîna şîn de bîyê û sîyasetkaran her reyê heto bîn sucdar kerdêne, Fransa de di kesî hetê selahîyetdaran ra amey tewqîf kerdene û binê nezaretî de bîy.

Dozgerê komar a Fransa Françoîs Mollînsî naye ser o da zanayene ke ê di meznûnî semedêbi rêxistinêda terorîste ra cinayetkerdiş ya kî seba cinayetkerdiş bi rêxistinêda terorîste ra têkilîye de bîyayîş” ra sucdar bîy. Nînan ra yew Omer Guney o ke 1984 de ame dinya. Seba ke delîlê sucî çin bî, Omer Guney ra teber o meznûno bîn ame raverdayene.

Derheqê Omer Guney de ameybî vatene ke bi xo kurd o dezgeyanê kurdan ê Almanya de îrtîbatê xo estbî. Labelê melumatanê Ajansa Xeberan a Firatî (ANF) ra gore Guney ne eslê xo ra kurd o, ne kî Munîh de bi dezgeyanê kurdan de îrtîbatê xo estbî. Guney heta serra 2010 weşîya xo şaristananê Bad Tolz û Schlîersee yê Almanya de, Munîh ra 50km dûrî, ramitêne.

Çîyo ke zanîno o yo ke Omer Guney serrê û di aşman ra ver reya verêne komelê kurdan ê Parîsî de ame dîyene. O wext Parîs Vîllîers-le-Bel de bîyo endamê komela kurdan. Naye ser o Mehmet Ulker, serekê Federasyonê Komelanê Kurdan ê Fransa (FEYKA) nîya va: “Roja 18. teşrîne ya serra 2010 de o [Omer Guney] ame komele ke o taw merkezê Parîsî de bîye. Serekê komele ra va ke wazeno endam bibo. (…) 18. teşrîne de endamname da û bî endamê komele. Her aşme 50 Euro aîdatê endamîye da û sey endamê normalî her roje ameyêne komele, bi şar û komelî ame têlewe, beşdarê aktîveteyan bî. Seba ke rind fransizkî zana, xeylê kesan rê sey tercuman ardim kerdêne. (…) Feqet qet pozîsyonê xo yo resmî komele de çin bî, tena yew endam bî. (…) Ma de hem kurd, hem tirk, hem kî fransizî besekenê endam bibê. Şertê qeydbîyayîşî çin ê.”

Vatenan ra gore Guney şoforê Sakîne Cansiz bî û roja kiştişê aye de Caniz rê kî şoforîye kerde. Labelê Ulker eksê ci va: “Ganî bizanîyo ke Guney şoforê Sakîne Cansiz nêbî ya kî meselanê bînan ê aye de kî meşgul nêbî.”

Derheqê meznûn Omer Guney de ANF ra gore yeno zanayene ke bi îhtîmalêde girs tirk o. Eksê tarzê xo yo mutewazî yê cuye, Guney wayîrê 45 taximanê kincan û 5 telefonanê destan bî, heyranê çekan û rêzefîlmê tirkî “Kurtlar Vadisi” (Newala Vergan) bî. Aye ra kî dot di hesabê xo yê Facebookî estê.

Tehqîqê polîs û dozgerîya Fransa hîna dewam benê. No esna de kî derheqê Omer Guney de xeylê melumatî vejînê çapemenîye de – nînan ra zafêrî kî rast nîyê.

3 ŞÎROVEYÎ

  1. îhtîmalêko pîl Omer Guney tirk o ,çunke qaso ke yeno zanayen kurdê sîvasî heme elewî yê û elewîyanê mîyan de nameyê omer çinyo, mi hettan nika nêdiyo ke elewîyêk nameyê ci omer bîyo. E madem no Omer Guney sîvasij o û sîvas de zî kurdê sunnî çinîyê, tenya îhtîmalêk maneno o zî no merdim tirk o..

  2. Kurd nîyo, Tirko, fasîsto… Komela Kurdî de çi saye keno, no gerekeke bîyero eskera kerdis. Endi naara tepîya mordeme nîyanene mundar gerekeke komeluna durri kerre… Komelî cayê sîyasetî ney, caye heyatê kulturê Kurdî bo. Komelunde endî Tirkî ney kurdkî qisey bo, o waxt ajan majan zerrede nimanene.

  3. Mi hata nika je Qetlîamê Paris ne caede wond neki esna…no çütir karaktero,çütir insanena, çütir dismenena,çütir kin`o ke hire tene hermete peye sarede nane pira kisene…iyeke afrikade orte birude woşiya xo ramene(yamyam)bêbextiye nanen nekene…ma key na tirkuna xo xelesneme,nolet sero birayena yino,birayena yino sare yinu buro…gereke inson xo na tirkura bisevkno,cika sike tirkura dür vindime honde rindo,her ciye yine qilerino,devleta xo,insanena xo,politika xo herçi…Na nêvesîye endi ma caverdime,beso endi yahu..

CEWAB BIDE

Keremê xo ra şîroveyê xo binuse
Keremê xo ra nameyê xo binuse