Dêrsim Mamekîye de pîrê elewîyî amey têlewe ke protestoyê rêxistina terorîste “Dewleta Îslamî” (DÎ) bikerê. Pîrê ke Kuçeyê Hunerî de amey têlewe, înan ra pîrê ocaxê axûçanan Mustafa Gençî nameyê pêrune de qisey kerd.

Pîr Gençî va ke “Ma sey domanê ocaxê elewîyanê Dêrsimî ameyîme têlewe. Armancê ma yo ke ma DÎya zalima gonîwere û qetlîamê ke a duştê şaranê Rojhelatê Mîyanênî de kena, pêro kes û dewletê ke bi çek û pere dest danê na torra muameleyanê teberê merdimîye, ma înan protesto û lanet kenîme. Yew serrî yo ke na torre Sûrîye û Îraq de şaranê ke nasname û bawerîya aye ra nîyê, qetl kena. (…) Çîyo ke ewro Sûrîye û Îraq de beno, sey Kerbelaya dîyin a. (…) Rîyê zulmê nê zaliman ra bi des hezaran kesî -cinî, camêrd û domanî- remay koyan, vêşanî û têşanîye ra merdî. Êyê ke weş mendî kî hîna tehlukeyê mergî ra nêxelisîyay.”

Dewamê qiseykerdişê xo de Pîr Gençî bextwaştoxî dawetê Dêrsimî kerdî. “Ma dêrsimijî kî verê cû qurbanê qetlîamî bîyîme. Ma venga şaranê ke rastê qirkerdişî bîy, danîme. Dêrsim dîyarê ocax û ewlîyayan o. Nê dîyarî de cayê her kesî esto. Nasname û bawerîya şima çi beno wa bibo, keyberê ma şima pêrune rê rakerde yo. Ma hezir îme ke sifreyê xo de leteyêde nanî û bardaxêda awe şima de pare bikerîme. Kerem bikerê, bêrê Dêrsim.”