Seba ke Dêrsim de tesîsê pakkerdişê kromî bêro viraştene, şar kot kuçeyan ke naye protesto bikero. Protestokerdoxan mîyan kî xeylê cêncî û wendekarê unîversîte estbîy, tede sloganî jê (sey) “Tesîs meviraze, rijnenîme to ser”, “Pilemurîye bêwayîr nîyo”, “Ma şar îme, rast îme, kunîme ser” ya kî “Ne bêvenîye, ne kî maden” amey eştene.

Hetê madenîya Mizurî ra plan beno ke Dêrsim Pilemurîye de seba madenê kromî ke serre de dorê 100.000 tonî kromî bivejo, tesîsê pakkerdişê kromî bêro viraştene. Seba ke no tesîs ra xeylê toz û duman vejînê û sero kî metalê giranî zerar danê dorûver, xeylê wext o ke viraştişê tesîsî rexne beno. Herçiqas ke şar kot no protesto, ame dîyene ke namzed ya kî temsîkaranê partîyanê sîyasî ra kes tey çin bî.

Heto bîn ra kî viraştişê tesîsî do zerar bido xebatkaranê şarî ke zafane ya mal weye kenê ya kî karê hemgênîye kenê. Serekê Yewîya Mêşevananê Dêrsimî Hakki Canpolatî ekolojî ser o qisey kerd va: “Qezaya ma de ma derbarê xo bi malweyekerdiş û rênçberîye kenîme. Ma hemgêno (hingîmêno) tewr rindan ra ju (yew) virazenîme. Ma jê (sey) rênçberî, duştê viraştişê nê tesîsî der îme, çike ronayîşê nê tesîsî sayeya qilêro ke do ci ra bivejîyo, do pêro mêşanê hemgênî bikişo.”

Şarî pêserameyîş de da zanayene ke o destûr nêdano ke şîrketî seba ke zêde kar bikerê, tebîat û dorûverê Pilemurîye xirabin bikerê. Mîtîngdaran bi sozê ke çi ke destebera bêro, duştê nê projeyî de vinderê, mîtîng ard peynîye.

CEWAB BIDE

Keremê xo ra şîroveyê xo binuse
Keremê xo ra nameyê xo binuse