Têkotişê (têkewtişê) neweyî werteyê Partîya Karkeranê Kurdîstanî PKK û ordîya komara Tirkîya zêdîyayê. Ajansa xeberan a Almanya ra gore roja şemîye, 19.06.2010, Şemdînlî de 11 eskerê tirkî merdî û 16 bîy dirbetinî. Xeberê ajansan ra gore gerîllayê PKK pêşewe bi (ebe) çekanê otomatîkan û bazûkayan ra hêrişê taburê ordîya Tirkîya kerd. Hêriş ra tepîya helîkopteran xeylê cayî bombarduman kerdî û xeylî eskerî amey rusnayene hetê sînorî. Di eskerî kî teqayîşê mayînî ra tepîya merdî. Goreyê ajansan ra kî xeylê cengdarê PKK merdî. A peşewe saeta dîyine de 250 gerîllayan hêrişê yew (ju) taburê eskeran kerdo. Heta şodir pêrodayîş bi vengê tifong û bazûkayan ra dewam kerd. Dima jetê ordîya Tirkîya cayo ke no hêriş qewimîyaybî, bombarduman kerd. Goreyê xeberan ra ordîya Tirkîya kî sînorê Îraqî derbaz kerd.

Her serre, wexto ke Kurdîstan de beno hamnan, têkotişî werteyê PKK û ordîya Tirkîya benê zêde. PKK destê wisarî de adirbestê xo ke yew (ju) serre ramitîbî, darit we. Nika rojname û sîyasetkarê Tirkîya xo ra persenê ke reformanê Erdoganî ra pey çayê pêrodayîşî benê zêde. Rasta ci kî, hepiskerdena sîyasetkar û domananê kurdan raya demokrasî û sîyasetî kerde xirabine. Xeylê pisporê sîyasî vanê ke heta weçinitişo newe yê Tirkîya kitabê rakerdişo sîyasî êndî ranêbeno.

CEWAB BIDE

Keremê xo ra şîroveyê xo binuse
Keremê xo ra nameyê xo binuse