Wezaretê Seveknayîşî yê DYA Pentagonî da zanayene ke o duştê rasterast rusnayîşê çekan bi pêşmergeyan der o. Goreyê vatena wezîr Ashton Carterî ra ganî çekî Bexdad ser o birusîyê kurdan.
“Ez zanena ke tayê kesê Waşîngtinî wazenê hukmatê Îraqî bîvîyarnê û dîrekt çekan birusnê kurdan û tayê eşîranê Îraqî”, Carterî va. “La ma duştê gamêda nîyanêne der îme, çike ma bawer kenîme ke Îraqo yewbîyaye cengê duştê ‘Dewleta Îslamî’ (DÎ) de hîna tesîrdar o.”
Verê, tayê endamê kongre û senatoran yew tesewurê qanûnî amade kerdbî ke rasterast rusnayîşê çekan bi kurdan rê destûr dano. Wina aseno ke hukmatê Obamayî kî duştê nê tesewurî der o. Zîyaretê xo yê nê hewteyî de, serekê Herêma Federal a Kurdîstanî Mesûd Barzanî Carterî de ame têlewe. Tey wezîrê pêşmergeyan kî beşdar bî. Mewzûyê kombîyayîşî cengê duştê DÎ de û taktîkê cengî bîyî. “Ez serekê Kurdîstanê Îraqî Mesûd Barzanî de ameya têlewe. Ma derheqê raverşîyayîşê ma yê duştê DÎ de qisey kerd. Ma sozê xo yê hetkarîye da, la ma naye pê hukmatê Îraqî kenîme,” Carterî va.
