Melumatanê Partîya Demokrat a Kurdîstanî (PDK) ra gore, PDK seba ronayîşê hukmatê heştin ê Herêma Kurdîstanî bi dina partîyan ra peymane îmza kerd. Xebere ra gore nê di partîyan mîyan de Yewîya Niştimanî ya Kurdîstanî (YNK) çin a.
Hewt aşmî weçînitişê parlamentoyê Herêma Kurdîstanî ra dime, pêameyîşê partîyan hîna nêame dîyene. Weçînitiş 21. êlule 2013 de bî, heta ewro hukmatê Herêma Kurdîstanî nêameyo ronayene. PDK weçînitiş ra tewr hêzdar vejîyaybîye, cayo dîyin de sey surprîz partîya vurnayîşî Gorran ameye. Muttefîqa verên a PDK, YNK, hîrêyine ameye. Seba ke hem PDK hem kî YNK mesela wezaretan ser o pênêameybî, boyna seba ke partîyanê bînan mîyan de îttîfaq ronênîyaya, heta ewro Kurdîstanê Başûrî de hukmato newe nêvirazîyayo.
Xebera sermişawîrê PDK Fazîl Mîranî ra gore nika peymane roja panşemîye îmza bîye. Îttîfaq de PDK ra teber Partîya Gorranî û Komelê Îslamî (Komal) estê. Xora PDK daybî zanayene ke ê peyê na aşme de do hukmatê Kurdîstanî ronê, YNK tey estbo yan ney. Hewteyo verên Gorran û PDK seba muzakeran do bêrê têlewe. Melumatanê nîyanênan ra gore Gorran wezeratanê pêşmergeyan û yê fînansî cêna – pozîsyonê ke eslê xo de YNK seba xo waştî. Komal kî wezaretê zîretî û yê dorûverî cêno.
Qerarê PDK ke bê YNK hukmat bêro ronayene, hetê YNK de reaskîyonêde giran vet. Yeno vatene ke bi îttîfaqê Gorranî peymana YNK û PDK a serra 2005 yena xeripnayene.
(Resim: Rûdaw)
