Hama-hama her serre vengê aştîye û çareserîye ke beno berz, çi hekmet a ke no veng xaftela birîno. Mordem honde nîyadano ke vengê aştîye û çareserîye ra eserê nêmendo. Nawo çand serrî yo ke hem serekkomer Abdullah Gul, hem kî hukumatê AKP derheqê çareserîya mesela kurdan de vanê “zaf çîyê rindî benê.”
Gelo nê zaf çîyê rindî çik ê?
Hama ke na vatene vanê, na vatene ra dime kî toz û wele miletî ser o vaydanê û halê miletê feqîrî rê êndî pepûk vaneno. Coka ewro êndî milet bawerîya xo bi nînan nêano. Raştî kî milet bawerîya xo bi nînan se bîyarone? Nê pey ra danê mordem ro, mordemî kişenê.
Paytextê Fransa Parîs de hîrê sîyasetkarê zê Sakîne Cansiz, Fîdan Dogan û Leyla Şaylemez ke yenê kiştene, no kî bi destê dewleta xorîye û bi destê zihnîyetê ke vanê “zaf çîyê rindî benê” bi destê nînan, nê weqetê nîyanênî yene kerdene. Na kî raşta raşt bêbextî ya. Raşta raşt aştîye balte kerden a.
Mordem bi nê bêbextan se bawerîya xo bîyarone?
Mi ra gore na gama ke seba çareserîye ama eştene, wazenê na game balte kerê. Seba ke na gama çareserîye mêrone balte kerdene, gere her kes destê xoyo ju wîjdanê xo ser no, destê xoyo ju kî êndî binê kemere kero. Wa hur dîmêna hetî kî fedekarênî bikere ke na mesela kî seba çareserîye raye bicêro û bi aştîye kî bixelesîyo.
Seba aştîye û çareserîye êndî dest bidê destî, doş bidê rê doşî û destê kam ra çi yeno, êndî xo peyser mecerê û gere hur dîmêna hetî kî bi fedakarênî gamanê hewlan bierzêne. Leweyê naye de kî gere dezge û komelê sîvîlê kurdan û tirkan kî zere û can ra destek bidero na çareserîye ke na çareserîye kî bireso armancê xo. Seba ke bireso armancê xo kî qet bêguman ma pêrune rê, yanî qic û pîl rê no xusus de kar û gure kûno. Her kes destek biderone ke ê wê ke wazene na çareserîye balte kerê, wa no destek zê lapaçe rîyê înan ra guno. Wa ê ki bizanê ke raya aştîye raya çareserîye ra vêrena ra.
Hukmatê AKP ke raştî biwazo û samîmî bo, na mesela hel bena. Her çî ra raver gere samîmî û honde kî cîdî bone. Na mesela çareserkerdene de samîmîyet, nêzdîbîyene û cîdî bîyene zaf muhîm a. Eke samîmî û cîdî nîya, ne xo tede eirdo ne kî xo rezîl û rûsifayê cîhanî kerone.
Bê fedekarênî na mesela çareser nêbena. Hetanî nika hetê kurdan ra xeylê fedakarênî ame kerdenê û zaf bedelê giranî kî amey dayene. Nê bedelanê giranan ra ju kî na weqeta Parîsî bîye. Ez kî bi na wesîle nê hîrê sîyasetkaranê kurdan Sakîne Cansiz, Fîdan Dogan û Leyla Şaylemez bi rûmet yad kena û bitaybetî mucadela Sakîne Cansize ver de kî bi rûmet bena çewt.
