Kamo ke seba zon û kulturê xo xizmet keno, kam o ke na raye de sereyê xo dejneno, kam o ke zonê dayîka xo xo rê qible gureto, kam o ke seba raxelesîyena kirmanckî qelema destê xo şuxulneno, wa Xizir tey ardim kerone û wa raya xo yakerdîye bo.

Rindîye a wa ke mordem zon û kulturê xo rê xizmete bikero. Eke bena xizmetkarî kî xizmetkarê miletê xo bê, xizmetkarê zonê xo û kulturê xo bê. Hîre serrî mîyan de DêrsimInfoyî ra xizmetêde hêca.

Mi ra gore kedkaranê DêrsimInfoyî hîre serrî mîyan de seba miletê kirmancî û seba zonê kirmanckî xizmetêde hêca û delal kerd. Mordem ke no xizmet înkar kerone ya nankor o ya kî hayrê verê nê xizmetî nîyo. Çizixa DêrsimInfoyî, çizixêda rind a. Eke na çixize de nîya dewam bikerenê, ez bi xo zere û can ra leweyê kedkaranê DêrsimInfoyî der a. Honda wo mi dest ra ame, honda wo ke îmkanê mi bî, ez bi zerrîweşîye û bêşert û bêşûrt destek dana DêrsimInfo. Wa na kî nîya hetê her kesî ra rind bêrone zanitene.

Çunke seranser bi zonê kirmanckî xizmet kerdene kî karê her kesî nîya. No semed ra kî keyepelê DêrsimInfo leweyê mi de cayêde zaf taybetî cêno.

Ewro eke wendoxê û nuştoxê zonê ma kirmanckî bîyê zêde, na kî sayeya serê keyepelanê zê DêrsimInfoyî ra bîyê zêde. Qet kesî kî xo na het ser û o het ser meerzo we. Seke mi corî kî kifşe kerd, kamo ke xo ra no xizmet înkar keno ya nankor o ya kî hayrê verê nê xizmetî nîyo. Ez naye zê nameyê xo rind zana ke zaf kesî keyepelê DêrsimInfoyî ra îstîfade kenê. Leweyê naye de kî wendene û nuştena zonê kirmanckî musê û hona kî musenê.

Ma naye ra rind xizmet?

Nuştox û wendoxê yew zonî ke roje bi roje zêde bê, o zonî kî verba raxelesîyene raye cêno. Raver şîyena kirmanckî, raxelesîyena kirmanckî ya. Raxelesîyena kirmanckî kî newe ra bîyena şarê kirmancî ya. Ma gere seba raxelesîyena zonê xo kirmanckî sereyê xo bidejnîme. Sereyê ma dejeno kî wa seba raxelesîyena kirmanckî bidejo. Nê dejê nîyanênî rê canê mi wa feda bo. Mi vatena xo rewna vata. Eke mi rê roje no sebeb ra qida yeno kî wa sarê mi ser û çimanê mi ser bêrone.

Hevalê hêcayî,

no xizmeto nîya hêca ke şima dest ra yena, şima kî qet xo peyser mecerê û dewam bikerêne. No xusus de destebera kam ra ke çi yeno, gere ke şarê xo rê, zonê xo rê, kulturê xo rê xizmet bikerone. Ez bi nameyê xo Wusênê Gestemerde no xizmetê nîya hêca de leweyê kedkaranê DêrsimInfoyî der a û kedkaranê DêrsimInfoyî kî semedê nê xizmetê nîya hêcayî ra fîraz kena.

* * *

Ez naye ra tepîya binê her nuşteyê xo de vana: “Her zon bi rengê xo û her milet kî bi qeseykerdena rengê zonê xo rind o.”