Serra 74. ya jenosîdê Dêrsimî de 26. gulane 2011 de Parlamentoyê Yewîya Ewropa Bruksel de no munasebet ra konferans dano viraştene.
Naye ra konferansê Dêrsimî 1938 reya 4. hetê fraksîyonê çepgiran ê Parlamentoyê Ewropa, Federasyonê Elewîyanê Demokratîkan, Cematê Ronayîşê Dêrsimî û Komala Kurmesanî ra destek cêno. No konferans de terteleyê Dêrsimî hîrê hetan ra, hetê tarîx, sîyaset û huqûqî ra yeno analîze kerdene. Seba musnayîşê dîmenzîyonê mîyanneteweyî yê huqûqî yê jenosîdê Dêrsimî xeylê pisporê tarîx, sîyaset û huqûqzanî beşdarê nê konferansî benê.
Komîteyê Konferansê Dêrsimî dayîşnaskerdişê xo de nîya vano: “Ma însanê ma yê ke 1937-38 de amey qir kerdene, bi hurmet yad kenîme. Înanê ke no tertele da viraştene kî nalet kenîme. Werte ra 74 serrî vîyart, labelê dewleta Tirkîya hîna rastîye înkar kena û no sîyasetê xo ra dewam kena.”
Jenosîdê Dêrsimî ewro ra 74 serrean ra raver 4. gulane 1937 de bi qerarnameyo taybetî yo ke hetê parlamentoyê Tirkîya ra ameybî vetene, ame viraştene. A roje partîya CHP hukmat de bî û pêro wekîlê înan seba no qerar rayê xo daybîy. Bi no qebulkerdişê nê qerarnameyî ra eskerîya Tirkîya kote Dêrsim û nêzdîyê se hezar kirmanc û armenîyî qir kerdî. Des hezar kesan ra zêde kî amey surgun kerdene.
