Parlamentoyê Almanyaya Federale seba piştigîrya Kurdîstanê Başûrî qeraro resmî girewt. Ney ra gore nêzdîyê 100 eskerê almanî aşma gucige de seba perwerdekerdişê pêşmergeyan duştê terorîstanê “Dewleta Îslamî” şonê Herêma Federal a Kurdîstanî.
Parlamento de 590 wekîlan qerar ekerd, 79 duşt de vejîyayî, 54 kî bêhet mendî. Bitaybetî partîya çepgira almane Die Linke û Partîya Keske duştê nê qerarî de ya kî notr bîyî.
Wezîra Seveknayîşî Von der Leyen kerd eşkera ke gucige de lîsteya ardimî yena eşkera kerdene. “Pêşmergeyan rê her çî lazim o”, sîyasetmedare va. Aşma pêyene artêşa almane bi hezaran çek, mermî û roketê duştê tankan de, pêro pîya erja 70 mîlyon Euroyî de, rusnabî Kurdîstan.
