133 rojî ceng ra tepîya, çeteyanê “Dewleta Îslamî” (DÎ) şaristanê Kobanê terk kerd, spîkerê YPG û yê pêşmergeyan da zanayene.

Goreyê melumatê Rêxistina Heqanê Merdiman a Sûrîye (SOHR) ra, vizêr cengdaranê YPG bi hetkarîya pêşmergeyan û hêrişanê hewayî yê DYA besekerd pêroyê şaristanî pak bikerê. Herçiqas ke rojhelat û başûrê rojhelatî de hîna pêrodayîşî estê û xeylê cayê şaristanî de hîna mayîn û bombayî estê, merkezê şaristanî binê kontrolê kurdan der o.

Fermandarê pêşmergeyan Ezedîn Tamoyî ra gore “Taxanê sînorî de hîna tayê pêrodayîşî estê, ser o kî hûmarêk suîqestkerê DÎ şaristan de estê, ma besekenîme tesdîq bikerîme ke merkez de hema-hema qet çeteyî nêmendî.”

“Hedefê ma yo verên azadkerdişê dewan o”

Operasyono peyên de çeteyî taxa Kaniya Kurda ra ameyî eştene. Fermandarîya Pêroyî ya YPJ ra Meryem Kobanê no derheq de va: “Ma vatbî ke Kobanê DÎ rê beno cehenem û ma naye nika Kaniya Kurda de pêro dinya rê îlan kerd. (…) Mucadeleyê ma hîna nêqedîya, hîna zaf cayî estê ke gerek ma nînan kî azad bikerîme. Axir ma çeteyî kotî ke dîyî, uca qir kenîme. Hedefê ma yo verên azadkerdişê dewan o.”

Serekê Herêma Federal a Kurdîstanî Mesûd Barzanî kî seba azadkerdişê Kobanê mesaj da va “Ma ewro xebera raxelisîyayîşê şaristanê xoverrodayîşî Kobanê girewte. Na xebere her kurdperwer û azadîperwer şa keno. Na serfirazîye serfirazîya pêro şarê Kurdîstanî ya.”

Cengê Kobanê 15. êlule 2014 de dest kerdbî ci. Tam yew serre ra ver Kobanê xo sey kanton îlan kerd. Çar aşmî ceng ra dima şaristan bombarduman, tank û topan ver de rijîya.

“Serfirazîye Kobanê serfirazîya pêro şarê Kurdîstanî ya”

Xebera azadkerdişê şaristanî Kurdîstan de bî semedê şayî û pîrozkerdişî. Xeylê şaristananê Kurdîstanê vakur, başûr û rojawanî de şar bi hezaran kewt kuçeyan ke azadîya Kobanê pîroz bikero.