Serba ke Kurdîstan çar hetan de parçe bîyo, naye de kî parçebîyena dîn, zon, kulturî bena. Na dewlemendîya kurdan hetê rejîman ra serba parçekerdene, vurnayene û asîmîlekerdena nasnameyê kurdan yena gurenayene. Çitur ke înan Kurdîstan parçe kerdo, ê wazenê ke sarê kurdan kî henî parçe bikerê.
Çitur ke rejîmê înkarkerdoxî û hetkarê înan kurdê elewîyan Tirkîya de bê nasnameyê înanê neteweyî cênê fekê xo, êzîdî kî tarîx de xeylê reyî Îraq de bê nasnameyê xo yê kurdî name benê. Kurdî “tirkê koyî” bîyî. Elewîyî kurd nêbîyî, êzîdîyî kurd nêbîyî, pêro kerdî tirk, kerdî ereb. Hona kî xeylê cayan de bê nasnameyê xo qalê kurdanê elewîyan beno û henî nusîno. Propagandaya dînan ra gore elewî û êzîdî kurd nîyê. Sebebê na propagandaya şîyaye ra xeylê elewî û êzîdî eslê xo înkar kenê û çekuya kurd û kirmancî nêcênê xo fek. Înan teyna “Ez elewî yo” ya kî “Ez êzîdî yo” vatêne û hona kî tayê nîya vanê. Hama zonê înan kurdkî ya, tayîne kî vatêne “Heqê dînan kî kurdkî qesey keno”. Nîya nasnameyo neteweyî sîstematîk înkar beno.
Tayê hemkarê êzîdîyan ra pîya partîyanê Îraqî xeylê serrî propagandaya “Êzîdî kurd nîyê” kerda. Şengal û Şêxan de nîya cerebnîya ke înan cografyaya Kurdîstanî ra cira kerê. Hama nasnameyê êzîdîyan û elewîyan kurd bî. Beno ke ebe kultur, zon, mîtolojî û îtîqatê xo ra kurdanê tewr kanan ra yê. No ju fenomeno zaf baldar o. Rejîman nê semedî ra tarîx de xeylê reyî cerebna ke elementê tewr kurdkî sarê kurdan ra cîya kerê. Labelê na propagandaya rejîman serranê peyênan de tesîrê xo kena vîndî.
