Yunanîstan û Spanya ra dima nika kî Macarîstan de krîzêde deynan qewimîya. Welatanê Ewropa de no taw tersêde girs esto, çike ey texmin kenê ke krîzê deynan Ewropaya Rojhelatî de kî yeno pa.

Hewteyo verên de Macarîstan de hukmato newe ame weçinitene. Yew (ju) hewte ra tepîya hukmatê neweyî da zanayene ke deynê Macarîstaî zaf berz ê û Macarîstanî besenêkeno ke deynê xo bido. Tayê ekspertê ekonomî kî vanê, no yew kayê hukmatê neweyî yo, çike no hukmat weçinitiş ra raver sozê girsî day û nika nêşîkîno sozanê xo dima şêro.

Bankaya merkezî yê Macarîstanî kêmîya butçeyê xo bi 4,5% nuşt hesab û kitaban, analîzkeranê xoseran ra gore na hûmare 5% a û hukmatê neweyî ra gore bena 7,5%. Na hûmare ser o şarê Ewropa bîyo şaş ke reqema hende berza muhîme senî nîya herey hesaban de bellî bena.

Analîzkerêde bankaya Danîmarka Danske Bankî vat ke, “Rewşa Macarîstanî henî sey (jê) Yunanîstan giran nîyo. Labelê ma tersenîme ke rojê ke ma ver der ê xeberê xirabinî dugelanê rojhelatê Ewropra ra bêrê. Macarîstan gerek nika tesaruf bikero, çike rewşa fînansî ya nê welatî hende rinde nîya. Problemo dîyin ê Macarîstanî o yo ke pereyanê dugelan rê zaf girêdaye yo. Ekonomîya Yunanîstanî binê krîzê giranî der o, labelê ekonomîya Macarîstanî henî nîyo û emser kî beno girs.”

Serra 2009î de Macarîstanî ÎMF ra 25 mîlyar Euroyî deynê neweyî girewtîbî.

Xebera xirabin a Macarîstanî ra tepîya pereyê Ewropa Euro ancîya (onca) erjaya xo kerde vîndî û gina 1,20 Dollarî ro, na linge de (06.06.2010) yew Euro keno 1,193 Dollarî. Na çar serran ra tepîya reya verên a ke Euro hende nizm bî.