Newroze na wo verê keyberî der a, welat hîna binê cengî de naleno. Başûr û rojawan de çeteyê DAÎŞ hêrişê pêşmerge û YPG kenê, vakur de kî tîmê Tirkîya şaristananê kurdan kenê wêran, sîvîlan kişenê. Bitaybetî Cizîre û Sûr de halê welat û welatîyan yaman o.
300 merdeyî, %80 yê şaristanî wêran
Cizîre (Şirnex) de qedexeyê tebervejîyayîşî 80 rojan ra tepîya darîya we, tayê hemwelatîyî pede-pede cêrenê ra keyeyanê xo, la ancîya Cizîre wêran o. Roje bi roje meyîtê înanê ke hetê dewleta tirke ra ameyî qetl kerdene, ê yenê dîyene û defn benê. Seba analîzkerdişê serebûtanê qedexeyî Partîya Mintiqayanê Demokratîke (DBP) nika raporê xo weşana. Heyetê DBP mabênê 10.-11. adare de Cizîre de bî. Netîceyê raporî nê yê:
Cinî û domanî tede, 300 sîvîlî ameyî kiştene. Dorê %80 yê şaristanî hetê topanê tankan ra zerar dî. Pêro pîya 500 banî rijîyayî, 2.000 banî kî nêm zerar dî. Hîrê rey birîndarê ke bodrumî de bîyî, ganî ameyî veşnayene. Ser o kî ekîbê taybetî kewtî zereyê ban û apartmanan, çîy-mîy û mobîlya veşanayî. Polîs û tîman ke kewt zereyê banan, sloganî nuşt dês û kincanê cinîyan ser o. Sloganê nîjaperestî û tirkperestî dêsanê banan ser o ameyî nuştene. Her cizîreyijî hetê dewlete ra potansîyel gumandar vînîya. Her roje şaristanî de cendeg yan kî parçeyê cendegan yenê dîyene. Cendegî estê ke hetê ekîban ra ameyî parçe kerdene.
Çi esto ke duştê pêro nê wehşetî de şar xo ver o dano û hezirîya newroze keno. Komîteya tertîpî plan kerd ke newroza emserrêne 22. adare de bêro pîroz kerdene. Nika komîte hetê qaymeqanîye ra cewab pawena. Komîte da zanayene ke newroze emserrêne bi ruhê serranê 90an bêro pîroz kerdene. Heyetê DBP ney ser o va ke “Semedê na berpirsîyarîye, a roje roja xoverrodayîş û parekerdişê dejanê ma ya. Beno eşkera ke duştê înan de ke nê dejî dayî ma rê, mucadeleyê newroze bi ruhê xoverrodayîşî ra teber qet yew raye çin a.” Texmîn beno ke mintiqayanê Kurdîstanî yê bînan ra xeylê beşdarî bêrê.
Sûr: 103 rojî qedexe ra tepîya ancîya qedexe
Ewro Cizîre de teror û zulmê dewlete dewam beno. La tena Cizîre de ney, Sûr (Dîyarbekir) de kî dewlete welat kerd xan û xirabe. 103 rojan ra tepîya qedexeyê tebervejîyayîşî qedîyabî, la hîrê rojan ra dime ancîya tayê taxan de qedexe nîyabî ro. Bi desan meyîtî estê şaristan de, her roje xebera kiştişan yena.
