Konserêde mîyanneteweyî de deyîrbaza kurde Aynur Dogan seba ke bi kurdkî kilamî vatê, hetê nasyonalîstanê tirkan ra ameye protesto kerdene.
Festîvala cazî Mujeres de Aqua ju (yew) fikrê Javîer Lîmonî bî. Bi no projeyê kilaman Lîmonî hîrê hunermendî ardî sahne. Verê, vokalîstê La Shîca û Sandra Carrasco kilamê xo yê flamenkoyî vatî. Dima, Javîer Lîmonî Aynur Dogan sahne ser rica kerd, va ke a “hunermenda tewr rinde bi vengo tewr pêt ê na cografya” ya. Labelê, wexto ke Aynure kilama xoya hîrêyine bi kurdkî vate, tayê seyrkerdoxan vatişê aye birnay û Aynure protesto kerd. Înan sloganê jê (sey) “Bi tirkî vaje”, “PKK bimiro” estî. Aye ra teber kî mînder û şîşeyî amey eştene bi sahne, deyîrbaze Aynure kî sahne terk kerd. Naye ra dime nê protestokerdoxan têfek ra marşa netewe ya Tirkîya vate, tayê grûban mîyan de kî pêrodayîş vejîya.
Çapemenîya tirke de ame wendene ke seba ke tayê rojan ra ver 13 ekserê tirkî ameybî kiştene, atmosfer zaf xirabin bîy, “gonîya miletî girêya”. Labelê zafêrîya rojnameyanê tirkan poştîya (piştîya) Aynur Dogan daye û protestokerdoxî rexne kerdî, ame wendene ke “Seba ke ma nêverday ke Aynuran 80 serre zonê (ziwanê) xo de biwanê, ma ameyîme no hal”, “Çekî bêveng bê, kilamî ney” ûsn. Gama ke Aynure sahne ra vejîya, zafêrîya seyrkerdoxan kî çepikan cinite, hetê aye kerde. Yeno vatene ke protestokerdoxê nasyonalîstî tena parçeyêde qijkek ê beşdaranê konserî bîy. Rojnameyê Radîkalî naye ser o şîrove kerd ke problem xora tîya (îta) r’ o: çitur bîyo ke zafêrîye heqê eqalîyetêde radîkal ra nêame?
Wane konserde ponc hazar millet biyo,hefe dino qe ne di-hire sey kutik nekuye tewer ne este…gereke ne kutik rindek bikuyeke o akile xuyoke cino bero sare ser…ayvo ayvo ponc hazar cutir ninere terse….