Bursa de grûbêda tirkan kiştişê 13 eskeran protesto kena

 

Badê ke 5 wekîlê neweyî yê BDP nêamey girewtene bi parlamento û qiseykerdişê werteyê AKP û BDP de bê netîce qedîyay, Kurdîstan de pêrodayîş werteyê artêşa tirke û hêzanê PKK de bîy zêde. Raver ra di eskerê tirkî hetê gerîllayan ra amey remnayene, hewteyo verên kî Dîyarbekir de 13 eskerî amey kiştene.

Na xebere ser o tayê şaristananê Tirkîya de protestoyî vejîyay. Nê protestoyan de sloganê antî-kurdan amey eştene û tayê beşdaranê protestoyan kî waşt ke hêrişê ban (bon) û dikananê kurdan bikerê. Tayê cayan de, jê (sey) Anqara û Konya de, dayîreyê BDP amey veşnayene ya kî rastê hêriş bîy.

Kiştişê eskeran ser o hîrê partîyê AKP, CHP û MHP ju (yew) deklarasyono muşterek îlan kerd ke her hêrişo sîyasî ya kî çekdar ke duştê juyîya (yewîya) welatî der o, nafîle yo. “Êndî gama qedîyayîşanê qiseykerdişan der îme.” Kemal Kiliçdarogluyî kî qiseykerdişê xo de vat ke eskerî ke duştê “teror”î de danê pêro, nika hepis der ê. Ey ra gore eskerê binê sucê cînayetî de hepis der ê, serbest bê ke duştê terorî de pêro bidê.

Analîzê tayê rojnamegeran ra gore sîyaseto resmî yê Tirkîya ra kurdî heqanê xoyê kolektîfan jê (sey) perwerde û statuyo resmî mecêrê ke qanûno bingeyî yê Tirkîya kî bê heqanê kurdan bêro vurnayene. Nîya aştîya mîyanê kurd û tirkan beno zor.

 

CEWAB BIDE

Keremê xo ra şîroveyê xo binuse
Keremê xo ra nameyê xo binuse