Serrgêra 73. ya qirkerdişê Dêrsimî de juna (yewna) fîlmê dokumenterî yeno viraştene.

Nuştox û cigêrayoxê dêrsimijî Dogan Munzurogluyî no dokumenter viraşt. Munzurogluyî raver ra îtîqad û kulturê Dêrsimî ser o tayê kitabî nuştîbî (“Elewîyê Dêrsimî”). O Mersin de nişeno ro û malimê felsefeye yo. Munzuraglu radyoyê “Radyo Ses”î de kî programê kirmanckî “Lom û Dem” virazeno.

No dokumenter de Dogan Munzurogluyî 25 kokimanê dêrsimijan ke terteleyê 1938 dîyo, înan de qisey kerdo. Ê dêrsimijî nika heyatê xo Mersîn, Xarpêt, Dêrsim û Îstanbul de dewam kenê. Şahidîya nê kokiman ra hîkayeyî yenê qisey kerdene. Tayê binê meyîtan de mendê û henî xelesîyê. Tayê bi hesîran ra vanê ke destan ra verba eskeran ke bi sungî hêriş kerd, day pêro, dirbetê xo musnenê.

Dokumenter de kî îxanetê Dêrsimî ser o qisey beno. Şahidê 1938 bi nameyan îxanet kenê eşkera: birazayê Seyîd Rizayî Rayberê Seyîd Axayî, Kewanê Sesliman, Zeyno Bîçîn, Yexir Îsmaîl, Cilê Mexstû, Rizê Kalici ûêb.

Barkerdena 1938 ra teber kî barkerdişê serra 1994 yeno musnayene. Tayê dêrsimijî 1938 ra tepîya 1994 de reya dîyine şonê xeribîye. Zafê înan hesreta welatî ra xeribîye de dinyaya xo vurnenê. Munzuroglu dokumenter de nê hetanê sosyal û psîkolojîkî ser o vindeno, mesela vurnayîş û parçebîyayîşê nasnameyan bellî keno: cinîyanê Dêrsimî de nasnameyo kirmanc û merdiman (mordeman) de kî nasnameyo tirk.

Dokumenter 73 deqa yo û bi formatê HD ameyo antene (ontene).

1 ŞÎROVE

  1. Heta nıka 38i ser o tayé dokumanteri amey vıraşténe. Sayiya né dokumanteran qırkerdışe 38 bı rasti ame ra zıwan u anciya sayiya né dokumanteran xélé kes musa ke 38 bı deste kam ameyo ronayéne.

Comments are closed.