18 rojanê protestoyî ra dime axir serekkomarê Misirî Husnî Mubarek duştê tevgerê demokrasî de koto bin û hirîs serran ra tepîya wezîfeyê xo ra îstîfa kerd. Seba nika eskerîye hukmat ramena.
Misir de vurnayîşo tarîxî ca girewt. 18 rojî protesto û xeylê merdeyan ra tepîya şarê Misirî heqê xo yê demokrasî ser o vindet û peynîya peynîye de serkote vejîya. Ardimkerdoxê serekkomarî Omar Sulêmanî da zanayene ke Mubarekî îstîfa kerd û êndî hukmat destê eskerîye der o. Serekkomaro kan Mubarek çêyê (keyeyê) xo ra pîya şî şaristanê tatîlî Şarm El-Şeyx. Roja panşemîye (posemîye) de Mubarekî bi xo beyan kerdîbî ke îstîfa nêkeno. Meydanê Tahrîrî merkezê Qahîre de bi sehezeran protestokerdoxî amey pêser û îstîfakerdişê Mubarekî pîroz kerdî. Bi ala û sloganan va ke “Şarî rejîm rijna!” Çiqas ke şar hewnê demokrasî de mendo kî tersê dîkatorîya eskerîye nişto ro. No sebeb ra protestokerdoxî wazenê boyna protesto bikerê ke reformê ke înan waştê, rast bêrê xebitnayene.
Sermîyanîya eskerîye da zanayene ke wazenê weçinitişo serbet peyda bikerê. Aye ra kî dot vat ke qet protestokerdox ke bê şidet maneno, nêno pêgirewtene. Pisporê mîyannetewyî hîna guman kenê eke eskerîye do rastikên demokrasîya raste bivirazo. Înan ra gore eskerîye duştê vurnayîşî de vindeno û do biceribno ke hukmat bianco (bionco) xo het.
Serekkomarê DYA Obamayî îstîfakerdişê Mubarekî pîroz kerd û va ke êndî vengê şarê Misirî ame heşnayene. Şansolyeya Almanya Merkel kî qalê vurnayîşê tarîxî kerd û Swîs ra ame beyan kerdene ke hesabê Mubarek û hetkarê ey bêrê wedardene. Hetê ra kî rotişê emlakanê Mubarekî ame qedexe kerdene.
Îstîhbaratê Amerîka ra gore Mubarekî heta ewro 40 mîlyarî Dollarî pere berdîbî welatanê bînan. Tena lajê xo Mubarek Gamal (47 serrî) wayîrê 17 mîlyarî Dollarî yo. Nê pereyî heta nika bankayanê Swîs, Almanya, Îngilîstan û DYA de bîy. Labelê şar û welatê Misirî hetê ra tim feqir mend, sirf sektorê turîzmî ra tenê pere kerd.
Protestoyanê Misirî ra ver welatanê ereban jê (sey) Tunîs û Yemen de protestoyî qewimîyaybîy. Nika kî Cezayîr de protestoyî bîy girs, dewlete bi desto pêt dana protestokerdoxan ro. Dewleta Sûrîye kî tersê serewedaritişî ra dorme ro dewanê kurdan girewt û hetta tora Înternetî birna.
