Çend rojan o ke serekê partîya tirkpereste “Vatan”î Dogu Perîncek û partîya xo ramenê serekanê kurdan ê tarîxîyan ser. Seba ke sembol û heykelanê Sey Riza û Şêx Saîdî wedarîyê, înan beledîye û walîyîye de gerre kerd. Sîyasetmedar û aktîvîstan ra dime na fay kî hunermendo dêrsimij Mikaîl Aslanî hesabanê xo yê medyaya sosyale ra cewabê înan da.
Mikaîl Aslan vano ke dewlete Sey Riza darde kerd ke vîrê însanan de nêmano. Waştena partîya Vatanî û serekê ci kî dewamê na mentalîte yo. “Coka darde kerd, meyîtê ey û hevalanê ey veşnayî, wela înan eşte hewa, la ancîya hêrsê înan nêqedîya. Ewro kî pê partîya Vatan û Perîncek wazenê heykelê ey birijnê. nameyê ey kuçeyan ra wedarê. Naye bikerê kî hêrsê înan nêqedîno.”
Dewamê nuşteyê xo de Mikaîl kî ê kesê ke zereyê komelê kirmancan de waşt name û mîrasê Sey Rizayî bixeripnê, ê rexne kerdî. Va ke bi serran “zereyê ma ra” tayê kesan cehd kerd, bi desan kitab û meqaleyî nuştî ke qîymetê Sey Rizayî çin bikerê. “Înan qebul nêkerdo ke Dêrsim de heykelê ey virazîyayo. Seba ke wesfê sermîyanê sîyasî û qehremanî nîyayo pira, no zaf şî zorê tayê kesan. Seba ke waşt nê fikrî bixeripnê, va ke o [Sey Riza] sêwî yo, va ke seyîd nîyo, va ke besenêkerdo eşîra xo îdare bikero, va ke rayber nêbîyo ûsn. Labelê ne Perînçek ne kî nê rîyakarê ke mîyanê ma der ê, şîkînê na roştîya raştîye tarî bikerê. Tarîx kesî rê neheqîye nêkeno. (…) Sey Riza roştîya seserran a. Tarîye ke bena qewetine, o kî hîna zaf şewle dano. O onurê ma yo, dest pamene!”
