15. gulane de şaxa Kurdî-Derî bajarê Mersînî de bîye ra. Roja bazarî, saeta çarine de hezar-hezar û ponc sey kesî verê bonê komele de amey têhet. Bi coşêde girs destî day pêro. Şeqa-şeqa coşî erd û asmênî heşnaye.
Virênîye de serekê komele Ahmet Gegesî rakerdişê komela Kurdî-Derî ser o qisey kerd vat: “Ma kurdî gere naye ra dime ziwanê xo ro daha zêde wayîr vejîme. Na komele sey wendegehê ma yo. Ma îtya seba ziwanê kurdî xebate kenîme. Ez wazeno ke êdî têde kurdî ziwanê xo ro wayîr vejîyêne.“
Ey ra dime namzedê wekîlê BDP Ertugrul Kurkçuyî ziwanê kurdkî û weçînitişê emserî ser o qisey kerd vat: “Êdî naye ra dime kes nêşikîno ziwanê kurdan bido qedexekerdiş. Çimke şima na yo eşkera yo ke ziwanê xo ro wayîr vejînê. Xora na kî heqa şima ya. Şaro kurd êdî heq û huqûqê xo zano. Naye ra dime kî heqanê xo ra derbaz nêbeno. Seba heq û huqûqê xo mucadeleyêde zaf çetin da. Naye ra dime wezîfê dewleta tirke o yo ke heq û huqûqanê şarê kurdî qanûnê bingeyî de bikero meşrû. Ez bawer keno ke şima weçînitişê emserî de kî seba heq û huqûqê xo mucadeleyê xo anê ca.“
Qiseykerdişê Ertugrul Kurkçuyî ra dime rakerdişê komele ame ca. Di dayîkan û Kurkçuyî lakê berî birna û komele kerde ra. Rakerdişê komele ra dime her kesî hêrişê verê “taş binay” kerd. Şarê ma seba şêhîdanê xo îtya qasê nêm saete nişt ro hukmat û dewleta tirke protesto kerdî.
Peyê cû, tayê kesan seba xebata şaxa Kurdî-Derî ya Mersînî û armancê aye ser o xo mîyan de mucilîye kerde. Persan ser o serekê komele Ahmet Gegesî seba armancê komele vat ke, “Ziwanê kurdkî maya lehçeyanê kurmancî û kirmanckî û soranî û loranî û goranî ya. Nê ziwanî sey bira yê. Na komele huqûqê nê ziwanan pêroyîn o. Komele îtya seba têde lehçanê kurdkî xebate ana ca. Îtya hem keyeyê kurmanckî yo hem kî keyeyê kirmanckî (zazakî) yo. Xebata ma derheqê her di lehçan de sey yew terazî ya.“
Ez kî şarê xo ra vano ke vateyê nê kesan têde raşt ê. Komela Kurdî-Derî şarê kurdî rê bixeyr bo. Feqet gere ma bizanîme ke meştê-bîro tayê kesî darik kenê qula mêşanê hemgênî ra. Nêverdanê ma hemgên biwerîme. Na derheq de gere ma heşar vinderîme û qîymet bidîme ziwanê xo. Çimke ziwan rîyê însanî yo, kulturê însanî yo. Lehçeyê ma têde kî kurdkî yê. Estbîyayîş û çinbîyayîşê ma girêdayeyê ziwanê ma yo.
Musayene û wendena ziwanê kurdkî wezîfê her kurdî yo. Bimusîme ke biwanîme, biwanîme ke xo bizanîme, xo bizanîme ke ê şarî ney, ê xo bîme.
Mehmet Seyîtalîoglu
