Xo vîr ra mekerê, 25. teşrîna verêne 2014 de roja şemîye ede Meydanê Galatasarayî de Mayê Şeme reya 500. yenê pêser. Hama qet nêbo şima kî qasê nêm seate nê meydan de ca bicêrê û vengê xo bi vengê Mayanê Şeme berz kerê.
Seke yeno zanitene, Mayê Şemîe 27. gulane serra 1995 ra nat her hewte yanê her roja şemîye ede Meydanê Galatasarayî de çalakîyanê roniştene virazenê. Nê kesê ke mordemê xo nezaret de bîyê vîndî, nê kesê ke mordemê xo binê nameyê faîlanê meçhulan de amey kiştene, yanî na grûbe hetê nê kesan ra virazîya.
Mayê Şeme, bi serran o ke verba mixenetî de bi can û bi royê xo mucadele kenê. Bi serran o ke seba azadîya miletê xo mucadele kenê. Bi serran o ke seba aştîyêda bingeyêne mucadele kenê. Bi serran o ke mordemê xû yê ke nezaret de bîyê vîndî, ere înan cêrenê. Bi serran o ke mordemê xû yê ke binê nameyê faîlanê meçhulan de amey kiştene, ere înan cêrenê. Yanî, panc sey hewte yê ke heq, huqûq, edalet re cêrenê.
Aaax şima Mayê Şeme, bi derd û kederan ê. Bi serran o ke Meydanê Galatasarayî xo re mekan gureto. Ne şilîye û ne şepelîye vate, ne serd û ne şewat vat, ne puk û ne pukeleke vate, ne germ û ne serd vat, ne zulm û ne zordarîya polîsan vate… her hewte roja şemîye bi resimê destê xo meydan de cayê xo guret. Na meydan de her hewte hêketa juyê vîndîbîyayî / hêketa juya vîndîbîyayîye yena wendene. Wendena her hêkete bi hesîra çimanê dayîkan, bi şîn û şîwanê dayîkan xelesîye.
Ewro reyna na hêkete yena wendene, oncîya bi hesîra çimanê dayîkan, oncîya bi şîn û şîwanê dayîkan xelesîna.
Aaax şima Mayê Şeme,
Ewro rojan ra roja şemî a
Ewro maya mi şemî ya
Ewro reya 500in a
Ewro maya mi oncîya bi derd û keder a
Wad bo ke, pîr bone ke
Nêzdî der ê rojê rindî, nêzdî der ê
Şima meberbê dayê, wayê, bira… şima meberbê
Dest û payan xo ver mekerê caran
Sareyê xo berz bicêre werteyê dost û dişmenî de
Vilê xo çewt mekerê dişmenî ver
Xo rê kerda xuyê înan bêbextênî
Ê rojê zereyê zlum û zordarîya xo de xeneqînê
Quya ke ma re kinita rojê înan rê bena mezele
Şima qe çîyê xo rê derd û merex mekerê dayê, wayê, bira…
Nêzdî der ê rojê rindî, nêzdî der ê
Wa kezeba mayan êndî lete mebo,
Bes o êndî meberbê mayî, meberbê.
