“Mayê Şeme” reya 144. Îstanbul de amey pêser. No pêserameyîş de dorê 100 xisimê kesanê vîndîbîyayeyan amey yad kerdene û seveknayîşê heqanê merdiman ame waştene. Bitaybetî Talat Turkoglu ke 01.04.1996 de binê nezaretî de bîyo vîndî, ame yad kerdene.

Cinîya Fehmî Tosunî ke serra 1995 ame vîndî kerdene, Xanime Tosun hewteyo verên de şîybî Newela Qesaba, aye qiseykerdişê xo de va: “Naye seba mi zaf zor bîye. Ma kommezelê ser o fetilîyayîme û nêzanayêne ke pay esteyanê kamî nayêne.” Tosun na mesela ser o va ke êndî wext wextê têrîameyîşî yo. “Nê çêyî (keyeyî) şima rehet nêverdanê, tewr tay şima înan rê cayê kemerade mezele bimusnê.”

Xanime Tosun ra tepîya waya Talat Turkogluyî Munîve Turkoglu qisey kerd û da zanayene ke birayê xo serra 1996 de binê nezaketî de ameyo vîndî kerdene. Aye va: “Herçiqas ke Dadgehê Heqanê Merdiman ê Ewropa derheqê dewaya ma de Tirkîye sucdare dîye, dewlete ra hîna qet vengê çin o. Hîna qebul nêbeno ke Talat Turkoglu binê nezaketî de bîyo. Tewr tay ma înan ra xeberê, kemerade mezele wazenîme. Çend serrî yo ke pawenîme. (…) Ma sîyaset ney, ma edalet wazenîme.”