Goreyê xebera ofîsê PDK ra maya serekê PDK Mesûd Barzanî, cinîya Mele Mistefa Barzanî, Hemayîl Xan, roja 27. temmuze 2011 de dinyaya xo vurnaye. Xeylê wext o ke maya Barzanî nêweşxane de tedawî dîyêne, a serê şodîrî sereyê (sareyê) xo na ro.

Semedê merdişê Hemayîl Xan ra dezgehanê resmî yê herêma Kurdîstanê Başûrî de hîrê rojê şîn û serwerşîye amey îlan kerdene. Tayê serekanê partîyanê Kurdîstanê Başûrî Barzanî rê mesajê serweşîye rusnay. Roja bîne camîya Sawafî yê Hewlêrî û xeylê şaristananê bînan de kî endamê çêyê (keyeyê) Barzanî, nas û dost û tayê temsîlkarê resmî amey pêser ke Hîmayîl Xan yad bikerê.

Hemayîl Xan cinîya serekê Mele Mistefa Barzanî bîye ke 1940an ra bi nat leyê mêrde û merdimanê (mordemanê) xo de seba xoserîya Kurdîstanî da pêro. Heyatê xo de a xeylê rey mecbur mendîbî ke çêyê (keyeyê) xo bar bikero.