Çalakîya duştê viraştişê qereqolî de, vizêr hêrişê eskeranê tirkan ê Licê de di kesî amey kiştene. Xeylê kesî kî bîy dirbetinî.

Çalakîya Licê de ke 15 rojî duştê awanîya qereqol û barajanê dewleta tirke dewam kena, vizêr peyê perojî esker û polîsî mudaxeleyê şarî kerd, çekî nay protestokerdoxan ra. Goreyê xebera DÎHA ra yew grûba dewijan çalakî kerd ke rayan bicêrê. Eskeran kî dorê saeta 16:30 de adir kerd ra. Sey netîce, no hêriş de di kesî amey kiştene, xeylê kesî kî bîy dirbetinî. Nasnameyê kesanê ke hayatê xo kerdî vîndî, amey neşr kerdene. Nameyê înan Ramazan Baran û  Bakî Akdemîr ê.

Hîna mintiqayanê Licê de hêrişî û çalakîyî dewam kenê. Eskeran nuqteyê kontorlî nay ro, rayî cêrîyay ra. Destûrê wasiteyan çin o ke dekewe ê mintiqayan.