Leyla Zana semedê roşanê zonê (ziwanê) kurdkî ra ju (yew) kombîyayîş de da zanayene ke raverşîyayîşê teknolojî zon (ziwan) asîmîle keno, duştê naye de gerek seba seveknayîşê kurdkî stratejîyade newîye bêro viraştene.
Komelanê Kurdî-Der û TZP Kurdî semedê roşanê zonê (ziwanê) kurdkî ke 10 rojan de yeno bimbarek kerdene, ju (yew) resepsîyon bi sloganê “Aştîya raste bi xoserîya zonê (ziwanê) kurdkî beno” da. No resepsîyon de xeylê roşnvîr, sîyasetkar û rêxistinê sîvîlî amey pêser. No resepsîyon ra ver kî ju (yew) sînevîzyon derheqê kurdkî de ame musnayene.
Serekê komela Kurdî-Derî Burhan Zorogluyî qiseyê rakerdişî de nîya va: “Roşanê zonê (ziwanê) kurdkî jê (sey) newroze bimbarek o. Ju (yew) zon (ziwan) sirf komunîkasyonê werteyê însanan nîyo, ruhê ju (yew) şarî yo. Zon (ziwan) kultur o, nasname yo. Eke şaro kurd zonê (ziwanê) xo rê wayîr mevejîyo, zonê (ziwanê) xo beno vîndî. Enformasyonê UNESCO ra gore, may û pîyî ke domanan de kirmanckî qisey nêkenê, peynîya nê zonî (ziwanî) yena. No semed ra êndî her wext zonê (ziwanê) xo qisey bikerîme.”
Namzeda xosere Leyla Zana kî va ke 20-30 serran ra tepîya axir çê (keye) de sanika kurdkî ameyêne vatene û her saete zonê (ziwanê) ma ame qisey kerdene. Raverşîyayîşê teknolojî ra pîya zonê (ziwanê) kurdkî asîmîle bîyo. Zana: “Înternet û TV domananê ma zonê (ziwanê) xo ra fînê dûrî. Aye ra gerek seba seveknayîşê zonê (ziwanê) ma stratejîyade newîye bêro viraştene. Gerek zonê (ziwanê) ma jê (sey) îtîqad domananê xo ra bimusnîme. Ewro zonê (ziwanê) sîyaset, medya û teknonlojî tirkî ya. No qet rind nîyo. Zon (ziwan) bîyayîş û çinbîyayîşê şarî yo. Ma ke zonê (ziwanê) xo ra hes kenîme, kî gerek ey biseveknîme.”
Sereko verên ê Dîyarbekîrî Osman Baydemirî kî roşanê pêro zonan (ziwan) ke tengasîye der ê, pîroz kerd û va ke gerek nê şarî qîymetê zonê (ziwanê) xo bizanê û ro ci wayîr bivejîyê. Baydemîrî mîzgîne da ke emser kreşo kurdkî kenê ra. Uca (uza) de seranser lehçeyê kurdkî kurmanckî û kirmanckî (zazakî) yenê qisey kerdene. Baydemîrî ra gore na game ra êndî domanê kurdî zonê (ziwanê) xo xo vîr ra nêkenê.
