Şaristanê Holanda Lahey de seba yadkerdişê kurdanê ke serra 1988 de hêrişê kîmyewî yê artêşa Îraqî de canê do day, heykelê jenosîdê Helepce ame ronayene. Rakerdiş de xeylê sîyasetmedarê Holanda û Kurdîstanî, ser o kî serekê beledîyaya Laheyî Jozîas van Aartsen verê heykelî de amey têlewe.
Bi emrê “Enfal”î hukmatê Îraqî yê rejîmê Sedam Huseyînî serra 1988 Kurdîstan de bi gazê kîmyewî 6.357 sîvîlê kurdî, tede xeylê domanî kî, ameybî qir kerdene. 14.765 kesî kî bîbî dirbetin û kud. Serranê peyê hêrişî de bi des hezaran kurdî semedê tesîrê nê qirkerdişî ra merd. Raporê Rêxistina Weşî ya Dinya (WHO) ra gore heta ewro 43.753 kesî heyatê xo kerdî vîndî û 61.200 kesî kî seqet mendê. Sedam Huseyîn hetê hêzanê DYA cengê Îraqî ra tepîya erzîyaybî dare.
