Serran ra tepîya ancîya (onca) Kurdîstan de serebûto gonin qewimîya, hêzanê PKK HPG hêrişê xo ya şewa 19. oktobre Colemêrg Çelê de goreyê enformasyonê çapemenîya tirke ra 24 esker û polîsê tirkî kiştî, 18 kî kerdî dirbetin. Melumatanê HPG ra gore hûmara merdeyan 81 ya.

Vilaweke de ke merkezê HPG daye zanayene, yeno nuştene ke 18 çalakîyanê hemdeman de 81 askerê tirkî kişîyay û bi desan bîyî dirbetin. Cengdaranê HPG kî xeylê çek û malzemeyê eskerîya tirke kerd xo dest. No hêrişo girs de kî hewt gerîllayî merdî. Goreyê xebera çapemenîya tirke ra hêriş de 24 esker û polîsî merdî, 18 bîyî dirbetin û dorê 21 gerîllayî hetê eskeranê tirkan ra amey kiştene.

Jê (sey) reaksîyon, sererkanîya pêroyî da zanayene ke eskerîya dewlete dest bi operasyonan bi 22 tabûran, yanî da-20.000 leşkeran, kerd. HPG ra gore duştê înan de 200 gerîllayî estê. Eskerê tirkî kî hewa ra destekê teyarayanê F4 û F-16 cênê. Operasyonî kî Kurdîstanê Başûrî, ohêmê (boverê) sînorê Tirkîya de ca cênê.

Serekwezîrê Tirkîya Recep Tayyîp Erdoganî no serebût ser o qiseykerdişê xo va ke kam ke terorî rê dest dano, hesabê ci bêro persayene. Bê ke name bikero, Erdoganî venga BDP da va ke qisaya aştîye ro înan nêşikîna. Serekkomar Abdullah Gulî kî reya verêne qalê heyfgirewtişî kerd. Hetê merkezê pêroyî ya BDP ra kî ame dayene zanayene ke “Nê adirî canê ma pêrune veşna. Ma vanîme ke êndî merdeyan rê bes o. Ma venga hukmat û PKK danîme ke çekan caverdê.” Serekwezîrê kanî yê Mintiqaya Xoser a Kurdîstanî Neçîrvan Barzanî bi wezîrê karanê teberî ya Tirkîya Ahmet Davutogluyî de ame pêser, hêrişê PKK rexne kerd û rojnamegeran ra va ke “Serebûtê nîyanênî mabênê tirk û kurdan xirabin nêkeno. Ma Tirkîya ra pîya r’ îme.” Barzanî kî sîyasetê rakerdişî yê AKP goyna û nîşan da ke omidê kurdan pîyagureyayîş bi tirkan o.