Kuba wazena bi Yewîya Ewropa (YE) ra têkilîya hîna pête rono. Pêşnîyaza nîyanêne hetê YE ra ameye qebul kerdene, wezîrê karanê teberî Bruno Rodrîguezî Havana de da zanayene.
Kubaya sosyalîste cewabê pozîtîf a pêşnîyaza Brukselî da. Bi serran muzakeran derheqê dîyalogêde sîyasî de ca de mendîbî. Nika wezîrê karanê teberî yê Kuba Bruno Rodrîguezî va ke hukmatê xo pêşnîyaza wezîrê YE Catherîne Ashtonî “bi werênayîş” qebul keno. Yanî, peynîya sîyasetê yewhetî bi YE û Kuba ameye.
1996 ra bi nat têkilîya Kuba û YE serdin bîye. Şertê YE bîy ke girawa Kuba de heqê merdiman, azadîya sîyasî û hemwelatîyan raver şêrê. Seba ke serra 2003 de Kuba de 75 muxalîfê dewlete ameybî tewqîf kerdene, YE pêro têkilîyî birnaybî. Badê ke amey serbet kerdene, îrtîbat ancîya ronîya. Naya ra di serran ver, Raûl Castroyî hukmat birayê xo Fîdelî ra girewtîbî xo dest. Prosesê naye de kî tayê qedexe û qanûnî amey vurnayene. Sey netîce 15 dewletanê YE bi Havana peymaneyî îmza kerdî.
