Yewîya (Juyîya) Qoçgîrî ya Ewropa (YQE) kongreya xoya verêne Almanya de şaristanê Mendenî de viraşt. Na kongre de YQE 11 endamê xo yê sermîyanîye çinitî we.
YQE di serran ra ver ame saz kerdene. Heta nika tayê şaristananê Ewropa de tayê komelî bîbîy ra û nika kî nê komelî bîy ju (yew) û binê ju (yew) organîzayson de amey pêser. Na kongre de temsîlkarê qoçgîrîyijan têfek ra day zanayene ke ê Pîr Sultan, Alîşêr û Hasret Gultekîn xo vîr ra nêkenê. Endamê YQE ke amey weçinitene, nê yê: Cemîl Koçgîrî, Abbas Ozer, Ayla Genç, Alî Demîr, Hasan Ozer, Dr. Turan Genç, Mamo Baran, Riza Demîr, Sabrî Demîrcan, Rahmî Taşyapan û Alî Ulger.
Destpêkê kongre de ju (yew) deqa êyê ke amey kiştene, pay ra amey yadkerdene. Dima, nuştox, sîyasetkar û hunermendanê qoçgîrîyijan qisey kerd. Nê qeseyan de ame eşkera kerdene ke gerek ke êndî (êdî) duştê asîmîlasyonê nasnameyê Qoçgîrî, kurd û elewîyan de şarê Qoçgîrî rind organîze bibo. YQE ard zon (ziwan) ke a nêwazena ke alternatîf juna (yewna) komele ya kî rêxistine bibo. Sereko dîyin ê YQE Alî Demîrî naye ser o va ke “Ma nêwazenîme ke heyfê terteleyê ke Qoçgîrî de ameyo viraştene, bicêrîme. Çi ke ma wazenîme o yo ke asîmîle mebîme, kultur û weşîya xo îstîqbal de biramîme.”
Peynîya kongre de tarîxnaso namdaro kurd Mehmet Bayrakî qisey kerd va ke merdim (mordem) besenêkeno ke Qoçgîrî Dêrsim ra cîya bihesibno. Bayrakî nimûneyê qirkerdişê kurdanê elewîyan da û eşkere kerd ke Tirkîya de asîmîlasyono etno-dînîyo giran esto. Peynîya peynîye de Bayrakî dewleta Tirkîya rê ju (yew) mesaj rusna û va ke gerek Tirkîya tarîxê xo de aşt bibo û ef biwazo.
