Grevê vêşanî yo ke hetê hepsîyanê kurdan ra dest pêbî, reşt pêro Kurdîstanê Vakurî û kewt waranê sîyaset, komel û çapemenîye. Seba ke ma bêveng memanîme, gerek ma ci ra haydar bîme. Coka DêrsimInfo ewro ra tepîya her roja grevî de tewr tay yew xebere derheqê grevî de neşr keno. Pêro xeberî na kommeqale de yenê pêser. Hetê peynîya grevî na komxebere her roje yew wext aktualîze beno.

Şima kî şîkînê ma Facebook û Twîtter ser o teqîb bikerê.

Seba destpêk û melumato bingeyên keremê xo ra na meqale biwanê: https://dersiminfo.com/greve-vesaniye-rest-roja-50/

Biwanê, pare bikerê, şîrove bikerê, dest bidê grevkerdoxan.

Radaksîyonê DêrsimInfo.


16.11.2012: Roja 66.

  • Panc rojî yo ke Dîyarbekir de seba piştîdayîşê grevkerdoxan her roje seata 19:00 de çalakî û nûmayîşî virazîyayêne. Nê protestoyan de heta nika 91 kesî, nînan ra 40 domanî, binê nezaretê polîsî der ê. Şarê Dîyarbekirî zî her şewe çilayan fîno ra ci, dano demir, korna û firaqan ro, nîya bi zelemele pêro şaristan reaksîyonêde girso sîvîl dano. Mudurê Asayîşî îqaz kerd ke nê vengvetişê firaqan do ceza bibo.  Cezaya pereyan do mabênê 50 û 400 de Lîra bibo. Şidet kî bajar de bî zêde. Kuçeyan de mabênê protestokerdox û hêzanê polîsî de pêrodayîşî vejîyay, barîkatî amey viraştene û veşnayene, kokteylê molotovî amey eştene, polîsî wesîta û bombayanê gazî xebitnay.
  • Serekkomarê Tirkîya Abdullah Gulî va ke o bi xo “grevê vêşanî yê parlamenteran teswîp nêkeno.” Gulî ra gore grev çareserîye nîya. Vizêr Bruksel de kî sîyasetkaranê kurdan dest bi grevê vêşanîye kerd.
  • Hunermendo namdaro kurd Şivan Perwerî da zanayene ke o kî keweno grevê vêşanîye. Perwer: “Ma no ziwan nêxeliqna. Homayî senî tirkî, erebkî û fariskî xeliqnay, henî kî kurdkî arde dinya. Labelê eke însanê ke hetê Homayî ra xeliqîyaybî, rastê zulmê însananê bînan benê, no ro Homayî bêrêzî ya, ro merdimîye zulm o. Şarê kurdî ser o zulmêde girs esto.” Perwer û yew grûba şexsîyan meşte saeta 10:00 Hewlêr de verê parlamentoyê Herêma Kurdîstanî de do dest bi grevê xo bikerê.
  • Înîsîyatîfê Şarê Amedî seba 17. û 18. teşrîne Dîyarbekir de yew grevê vêşanî yê piştîdayîşî plan kerd. Naye ra gore bi hezaran kesî do bikewê grevê vêşanî yê 48 saetan.
  • Dîyarbekir de sey rojanê bînan saeta 19:00 ra dime çalakîya piştîdayîşî bi panayîşê roşnî, hayleme û vengvetiş, nûmayîş, padayîşê tencere û firaqan dest kerd ci û tim şewe dewam kerd. Polîsî mucadeleyê protestokerdoxan bi bombayanê gazî kerd.

17.11.2012: Roja 67.

  • Cîzîre (Şirnex) de vengdayîşê BDP ser o bi seyan kesî seba grevê vêşanî yê di rojan amey têlewe. Grev parkanê şarî de do 48 saetî biramo.
  • Sey qezayanê bînan, Colemêrg de kî vengdayîşê BDP ser o komgrevê vêşanîye dest keno ci. Temsîlkarê rêxistin û partîyan û şar park û baxçeyan de saeta 10:00 ra heta meşte saeta 16:00 kewenê grev. Mayê aştîye tede, dorê 500 kesî dest danê da-10.000 hepsîyanê ke 67. rojî grevê vêşanî der ê. Dikanî kî amey cadayene.
  • Ame dayene zanayene ke 10.000 hepsîyan ra 400 verê tehlukeyê merdişî der ê.
  • BDP û Înîsîyatîfê Şarî veng daybî ke ewro ra tepîya yew grevê vêşanî yo kolektîf bêro kerdene. Nê grevî keye, park, war û sazgehan de ca cênê. Bitaybetî Dîyarbekir, Colemêrg û Şirnex de nê çalakîyî eleqeyêda girse dîye. Dîyarbekir de, seba ke grevê destekdayîşî amey qedexe kerdene, polîsî mucadeleyê protestokerdoxan bi bombayanê gazî û awa tazyikine kerd, pêrodayîşî qewimîyay, yew wesitaya polîsî ameye veşnayene. Şaristan maneno ro halo îstîsnayî.
  • Agirî, Bazîd, Mûş, Gimgim, Tetwan, Erdahan, Bidlîs, Îzmîr, Bursa û Îstanbul de kî bi yew tewir grevanê vêşanî yê piştîdayîşî dest kerd ci. Îstanbul de pêrodayîşî estîbî, polîs û protestokerdoxî kewtî tê. Tayê birîndarî amey berdene bi nêweşxane.
  • Seba piştîdayîşê grevê vêşanîye hunermendo kurd Ferhat Tunç kî kewt grevê vêşanîye. Deyîrbazê dêrsimijî naye ser o va: “Manaya roja ewroyêne girs a. 17.11.1937 de Seyîd Riza û hevalê ey amey darde kerdene. Qiseyê Seyîd Rizayî ke dişmenî ver çok ronênano, vengê xo grevê vêşanîye de vînenê. Ewro kî 10.000 kurdî verba polîtîkaya dewleta Tirkîya de çok ronênanê. Ez sey lajê şarê xo nika ra dime kewena grevê vêşanîye.”
  • Seba protestokerdişê sîyasetê dewlete û destekdayîşê grevê vêşanîye endamê Komala Dêrsimî ya Anqara amey têlewe. Serekê komele Yaşar Kilavuzî qisey kerd va ke serra 75. ya jenosîdê Dêrsimî de zulmê na dewlete hîna nêqedîyayo. “10.000 hepsîyê sîyasî yê kurdî verê merdişî der ê, labelê dewlete zulmê xo ra dewam kena. Ma wazenîme ke waştişê kurdan leze bêrê qebul kerdene.”

18.11.2012: Roja 68.

  • Hunermend Şivan Perwerî vizêr da zanayene ke o seba destekdayîş hazir o ke Hewlêr ra peya şêro Dîyarbekir.
  • Muzakeran ra ke bi serekê pêroyî yê PKK Abdullah Ocalanî ra amey kerdene, vilaweka Ocalanî beyan bîye. Tede ame vatene ke gerek grevê vêşanîye biqedîyo û eke bêro kerdene, hepsîyan ney la însanê ke teber ra yê, naye bikerê. Verê, hetkarê serekwezîrê Tirkîya Bulent Arinçî grevê veşanîye ser o vatîbî ke o bawer keno ke grevê vêşanîye her game şikîno bêro peynîya xo.
  • Xebera Ocalanî ser o hepsîyanê grevkerdoxan grevê xo yê vêşanîye ard peynîye. Hepisxaneyanê Dîyarbekir, Mersîn, Mîdyat, Erzirom ûêb. de grevê vêşanîye xelisîyay, mehkumî amey berdene bi nêweşxaneyan.
  • Grevkerdoxanê bînan ê piştîdayîşî şaristananê Ewropa û Tirkîya de kî grevê xo yê vêşanîye ard peynîye. Parlamenterê BDP ke grev de bîyê, kî grev xelisna.
  • Hemsereko pêroyî yê BDP Selehettîn Demîrtaşî Mûş de qisey kerd va ke “Şaro kurd wazeno ke weşîya xo azadane biramo û xo bi xo îdare bikero. Nê grevê vêşanîye ha seba nê waştişan ê. (…) Na saete ra tepîya ma meselanê xo bê merdeyan çareser bikerîme, pîya ronişîme, qisey bikerîme, tabî ma do nuqteyê pêameyîşî bivînîme. Şaro kurd her çî rê hazir o, hem seba xoverrodayîş, hem kî seba dîyalog. Nika qerar yê hukmatî yo, yê serekwezîrî yo.”

Nîya 68 rojan ra tepîya grevê vêşanî yo ke tey peynîye de 10.000 însanî beşdar bîy, reşt peynîye. Eke waştişê grevkerdoxan bêrê ca, hîna bellî nîyo.