Lejê tîcaretê esrarî de polîsê Kolombîya no hewte 14 qeçaxçîyê esrarî Bogotá û şaristananê bînan de pêgirewtî. Goreyê melumatê polîsî ra mîyanê nê sucdaran de kî berpirisîyaro bingeyîn ê çeteyî esto ke hewteyê de 1,5 ton kokaînî rusnayêne DYA, Hondûras, Domînîk û Ewropa. Henî ame dayene zanayene ke 14 tewqîfbîyayeyî yenê rusnayene bi dadgehêda eyaletê DYA Vîrgînîa.

Bi serran o ke dadgeha Bogotá ceribnena ke sucanê “herbê qilêrinî” ser o vindero. Herbê esrarî yê Kolumbîya de serranê 1960an ra bi nat dorê 200.000 însanî merdî. Dewleta Kolombîya duştê partîyanê gerîla û çeteyanê esrarî de hema-hema bêhêz menda. Wextê hukmatê serekkomar Alvaro Urîbe mabênê 2002 û 2010 de bi hezaran sîvîlî, tede kî xeylê domanî amey kiştene. Hem hêzanê gerîlayan hem kî parçeyê artêşa Kolombîya mîyanê karê esrarî der ê û bi şiddet û terorî semedê tîcaretê esrarî ra benê zengîn. Dadgehan paramîlîteran ra teber kî endamanê eskerîye, îstîhbarat, polîs û hukmatî ser o dewa kerdo ra.

Na aşme kî serekê rêxistina çepgire FARC Alfonso Cano operasyonêde eskerîye de ame kiştene. Kiştişê Canoyî heta nika serkewtişêde tewr girs ê serekkomar Juan Manuel Santosî yo. Par kî serekê eskerî yê FARC hetê artêşa dewlete ra ameybî kiştene. Labelê pisporan ra gore kiştişê Canoyî peynîya partîya komunîste nîya. 50 serrî yo ke FARC duştê dewlete de cengê gerîlayî ramena. Rêxistine de ke xo bitaybetî bi tîcaretê esrarî ra fînanse kena, da-9.000 rençberî estê ke mintiqayanê tenhayan ê welatî de bêçare mendê. Zafê reyan FARC rehînan cêna. Rehîna tewr namdare sîyasetkare Îngrîd Betancourt bîya ke serra 2002 de ameye remnayene û serra 2008 de kî ameye caverdayene.

CEWAB BIDE

Keremê xo ra şîroveyê xo binuse
Keremê xo ra nameyê xo binuse