Hûmara merdeyan a hêrişê Kobanê vejîyaya 152. Da-182 kesî kî dirbetin ê.

Xeberan ra gore, hîna terorîstê DAÎŞ zereyê şaristanî der ê û pêrodayîşî dewam benê. Heta nika dorê 30 çeteyî ameyî kiştene. Yeno vatene ke tayê terorîstî zereyê mektebê Miştenurî û yew nêweşxane der ê. Xebera YPG ra gore hêzê YPG kuçe bi kuçe gêrenê ke şaristan de çeteyî nêmanê.

Vizêr çeteyan besekerd pê unîformayanê YPG û Artêşa Azad a Sûrîye bikewê Kobanê. Hîrê teneyan xo bi wasitayanê bibombayan teqna. Melumatê YPG û Rêxistina Heqanê Merdiman a Sûrîye (SOHR) ra gore, terorîstî vîyarteyê sînorê Tirkîya ra kewtî zere. Serekkomarê Tirkîya Tayyîp Erdoganî no derheq de vatbî ke guna Tirkîya tey çin a. Ey ra gore çeteyê DAÎŞ hetê Cereblus, rojawanê Kobanê ra ameyî. Çi esto ke hemserekê PYD Salîh Muslimî duştê nê vateyan de vejîya.

Muslîm: Mumkîn nîyo ke Cerablus ra ameyî

“Nika mumkîn nîyo ke çîyêde qetî vajî. Kaşkêna nê gumanî nêbîyêne. Nê gumanî kî girêdayeyê selahîyetdaranê tirkan ê. (…) Îmkano ke çeteyî hetê Cerablusî ra kewtî zere, çin o, çike uca yew çem esto û hetê YPG ra kontrol beno.”