Boksero ukraynayij Vladîmîr Klîçkoyî na şeme reqibê xoyê îngilîzî Davîd Haye de da pêro û maç ra serkote vejîya. Nîya Klîçko ancîya (onca) bîyo şampîyonê dinya yê boksî.
Her hîrê hekemanê hûmare ra gore Vladîmîr Klîçko 12 rauntan ra tepîya verên ame. Nika Klîçko, bi naznameyê xo “Dr. Eisenfaust” (Dr. Asingirmik), wayîrê hîrê kemberanê şampîyonan ê boksî yo: ê ÎBF, WBO û WBA. Kembero çarin kî destê birayê xoyê pîlî Vîtalî der o. Aye ra tarîxê boksî de reya verên a ke pêro xelatê boksî destê ju (yew) famîlya der ê.
Maçê boksî Almanya Hamburg de verê çimanê 40.000 seyrkerdoxan de ca girewto. Esnaya maçî de eşkera bî ke Klîçko na fay kî jê (sey) şampîyon vejîna, labelê reqibê ey Haye kî di-hîrê rauntan de hunerê xo musna koto ser. Sirê Klîçkoyî harmeyê xoyê dergî yê ke mesafeyê mabênê xo û reqibanê xo keno zor. Xora Haye Klîçkoyî ra 8 sm qijkek û 13,5 kg xefîf bîyo. Herçiqas ke Haye çîp payan ser o gureya, duştê hêrişanê Klîçkoyî yê huşkan de şanşê xo kêmî bî. Feqet pêrodayîşo nêzdî de ge-ge henî asayêne ke Klîçko çetinîye antêne (ontêne).
Seba Klîçkoyî no maç serkotişê xoyo 56. bîyo. Boksero 35serre hîna wazeno ke karîyerê xo dewam bikero, xo hîna rind vîneno. Davîd Haye no musabeqa de heyatê xo de reya dîyine kerd vîndî, hîna bellî nîyo ke karîyerê xo dewam bikero yan ney.
