Na aşme kîrayê Hewlêrî ancîya bîyê berzî, resayê rekoro newe. Ewro Hewlêr de kîrayî par ra gore bîyê di qatî.
Goreyê Yewîya Kîradaranê Hewlêrî, kîrayî tewr zaf paxtextê Herêma Federal a Kurdîstanî de benê berz. Semedê bahabîyayîşî hûmara multecîyan a ke Îraq û cayanê bînan ê Kurdîstanî ra remayî ameyî Hewlêr. Statîstîkê Herême ra gore Kurdîstanê Başûrî de nika 2 mîlyonî multecîyî ciwîyenê. Wexto ke aşma verêne terorîstanê “Dewleta Îslamî” (DÎ) Anbar îşgal kerdî, des hezarêna ameyî.
Destpêkê cengî ra bi nat 92.000 keyeyan, bitaybetî ereb û xirîstîyanî, bar kerd şîyî Hewlêr. Goreyê qanûnê bingeyî yê Îraqî Hewlêr der her hemwelatîyê Îraqî rê destûrê roniştiş, kîradarîye û rotişê/herînayîşê banan esto. Herçiqas ke tena multecîyî bi xo berpirsîyar nîyê, ê parçeyo girs ê krîzê emlakî yê Hewlêrî yê.
Par, kîraya 100 metrekareyan $300 ra kêmî bîye, la nika vejîya $600. Cayanê sixlet û atraktîfan de na reqeme bena di yan hîrê qatî kî. Nê des serranê verênan de Hewlêr de 265.000 banê neweyî hetê hukmatî ra ameyê viraştene. 219 kesan rê kî emlakî ameyî dayene. Çi esto ke semedê multecîyanê ke yenê Kurdîstanî, no bes nîyo. Xeylê ban û dayîreyî êdî tena seba 6 aşmî kîra benê, o ra dime zafane kontrato newe û hîna baha virazîno.
No çi qanûno bingeyî yo ke ma ereban rê destûrê bangirewtişî danî? Qanûnê ÎRaqî? Qanûno ke Bexdad bi xo goş ser nênano û kurda rê para budçeyî nêdano? Ma ereba rê zaf çî day!!! Semedê înan ra kurdê ma kîrayo vay danî!!!