Xeberanê nikayênan ra gore teyarayê artêşa Tirkîya Şirnex de dewijê kurdî bomba kerdî, nêzdîyê 35 kesî no bombarduman de amey kiştene, 17 hîna vîndîbîyaye yê.
Dewa Roboksî ya Qezaya Şirnexî Qilabanî de jetanê F-16 dorê saeta 21:20 de hetê sînorî de da-50 dewijê kurdî bomba kerdî. Cendegê bombardumanî bîyê parçe û veşayê. Heta nika 35 meyîtî amey dîyene, xeylê kesî hîna vîndîbîyaye yê. Îdîayan ra gore mîyanê merdeyan de kî xeylê doman û cêncî estê. Ame vatene ke dewijê ê cayan, gama ke kaçaxçîye kerde, amey bomba kerdene.
Goreyê vilaweka artêşa Tirkîya ra roja 28. kanûne 2011 saeta 18:39 de hetê îstîhbaratî ra grûbêda çekdaran ameye dîyene ke sînor derbaz kerdo. Teyarayanê cengî yê artêşa mabênê saetanê 21:37 û 22:24 de adir na pa. Heta nika analîzê netîceyê ê operasyonî hîna yenê kerdene.
Kiştişê dewijan hetê xeylê kurdan ra şaristananê Kurdîstan û Tirkîya de yeno protesto kerdene.
Xeylê rojnameyanê dinya kiştişê Şirnexî ser o xeberî weşanayê. Rojnameyê Fransa Liberation, yê Almanya Tagesschau, yê Îngilîstan The Guardian ûêb. no qetlîam kerd manşet û nuşt ke dorê 20 sîvîlê kurdî hetê teyarayanê tirkan ra amey kiştene. Le Figaroyî kî nuşt ke jetanê tirkan dewa Roboskî bomba kerde.
