Xebera rojnameyê amerîkayijî The California Courier ra gore Prof. Taner Akçamî kitabxaneyê Arîzona Glendale de ju (yew) konferans de eşkera kerd ke dewleta Tirkîya akademîsyenê ke jenosîdê armenîyan înkar kenê, pere dano înan.

Kombîyayîş de prezantasyonê Prof. Akçamî ra ver ju (yew) dokumenterê Dr. J. Mîchael Hagopîanî bi nameyê “The River Ran Red” (Çem sûr herikîyayêne) ame musnayene. Tepîya Prof. Akçamî qisey kerd û babeta qirkerdişê armenîyan ser o vindet. Akçamî vat ke Tirkîya derheqê qirkerdişê armenîyan de DYA de sîyasetêde zaf sîstematîk û hêrişkar keno. “Şemaya girs a Tirkîya hîna a ya ke îdîaya xo DYA de bêro qebul kerdene. No semed ra Tirkîya materyalê xoyê revîzyonîstî ano zereyê programanê tayê unîversîteyan.

Prof. Taner Akçamî par Îstanbul zîyaret kerdîbî û uca (uza) de ju (yew) merdimo (mordemo) ke wayîrê enformasyonanê nimitan ê wezîrîya karê teberî yê Tirkîya bî, ey de qisey kerdîbî. Nê merdimî (mordemî) Prof. Akçamî rê eşkera kerdo ke serranê 2004 û 2005 de tayê profesorê DYA bi otorîteyê wezîrîya karanê teberî yê Tirkîya bi nimitkî amey pêser. No pêserameyîş de profesoranê amerîkayijan ard zon (ziwan) ke “Tirkîya derheqê jenosîdê armenîyan de wayîrê programêde sîstematîk sevîyêda akadamîke de nîya.” Amerîka de “îdîaya jenosîdî” xeylê cayan de bîye vila, raver şîya, no semed ra ê pêserameyoxan ra gore gerek Tirkîya mucadele bikero ke amerîkayijî pê jenosîdê 1915 bawer mekerê.

Prof. Akçamî dewam kerd ke Tirkîya no semed ra zaf pereyî transfer kerdo bi DYA. Nameyê nê akademîsyenan ke hetê Tirkîya ra pereyî girewtê, kî eşkera yê. Dokumanê ke ser o îmzayê nê kesan estê, goreyê melumatê Prof. Akçamî tespît bîy.

Prof. Akçamî kitabê Mîchael Gunterî “Armenian History and the Question of Genocide” (Tarîxê Armenîyan û Persa Jenosîdî) da nas kerdene ke no kitab ju (yew) nimûneyê transferê pereyê Tirkîya dano. Jê (sey) qisaya peyêne Prof. Akçamî da zanayene ke nika ra akademîsyenan ra kes bê delîlo rast mêro sucdar kerdene. Eke kes xo ra raver şîyêne û eşkera bikerdêne ke kam çimeyanê Tirkîya ra fînanse bîyo, a game na mesele tenêna eşkera bibîyêne.

1 ŞÎROVE

  1. Ti zof wes be birez Prof. Taner Akcam. Akcam ju abideye namus u akademiyo. Fikre u kare xobeters anora zon u seba kare xoye qebulbiyayise jenoside Armeni zof gureyeno. Na semeda Tirki eyra qe hasnikene. Ci hefyo ke ebe istifa kerdise Taner Akcam Projeye 1938ra, Dersimizi ju sanse girs ra bi. Ci hefyo ke mordeme qiskeke Yasar Kaya seba kariyer, perey mordeme je Taner Akcam na projeyra ramna. Peye Akcamik xever day, kufir kerd, heqeret kerd. No xeberik mare musneno ke Akcam ju mordemo xirt u hunerino. No Tikriya her cade perey vila keno, kam zoneno belka taye Dersimizik no perey ra gureto ke, mesela Dersim 1938 ik meydane internasyonelde, mebiyo nas biyene, reklam kerdene. Na seba gerekeke Taner Akcam na projera ame bezar biyene. Sima mi fam kene? …

Comments are closed.