Wexto ke di hewteyan ra ver şîrketê komputure Apple kombîyayîşêk de telefonê xo yê destan o newe da nas kerdene, reaksîyonê çapemenîye mendîbî ro şikitişê xeyalan. Her kes modelo newe, iPhone 5 pawitêne, hurendîya (herinda) ci de Apple modelê iPhone 4S, versîyonêde başêrkerde yê iPhone 4 da nas kerdene. Pêro vengûvaj û hêvîyê heyrananê Apple ke modelo teze do dîzayno neweyo barîyo tenik bicêro, tal ra şîy – qet nêbo seba emser.
Labelê duştê naye de kî modelo newe rekoran şikna. 24 saetanê verênan de 1 mîlyon siparîşê telefonî amey kerdene. Heyranê markaya amerîkayije bi rojan verê dikananê Apple de vejîyayîşê 4S pawitê. Vanê, no waştişo berz kî tikê semedê merdişê awankerê Apple Steve Jobsî ra yo ke prezentasyonê telefonî ra ju (yew) roje tepîya dinyaya vo vurna.
Hetê dîzaynî ra ferqê iPhone 4S û iPhone 4 çin o. No kî seba Apple ke mesela dîzaynî de jê (sey) şîrketêde averperwer say beno, surprîz o. 4S di rengan de roşîna: sîya û sipî. Aye ra kî dot zereyê telefonê destan de tayê çîyî vurîyayê. Antenê iPhone 4S di tene yê, nîya kalîteyê qiseykerdiş tenêna rind o. Kameraya modelê verênî de 5 megapîkselî estbî, iPhone 4S de kamera bi 8 megapîkselî fotografan ancena (onceno) û şikîna formatê Full HD, yanî 1920 x 1080 pîkselî de vîdeoyan bianco (bionco).
Prosesorê 4S kî tenêna rind o. Prosesorê A5 zaf çîp gureyeno û nîya hêzê iPhone kerdo di qatî. Pê naye xebitnayox besekeno program ya kî kayê bi grafîkêde berz bigurenê. Ser o kî iPhone 4S de sîstemê iCloud esto ke pê xebitnayox şikîno pêro data û enformasyonê xo bar bikero bi Înternet û nîya zaf rehet neql bikero telefonêde bîn ya kî komputura xo.
Pêro nê fonkîsyonan ra teber modelê Apple yo newe de sîstemêde Sîrî esto ke jê (sey) fonksîyono tewr balkêş yeno dîyene. Sîrî programêde naskerdişê vengî yo kompleks o. Xebitnayoxê iPhone çîyê pers keno, program vengê merdimî (mordemî) nas keno û cewabê ê persî dano. Programêde nîyanên kî raver ra telefonanê destan de entegre bî, labelê çîyêde newe o yo ke Sîrî hem persanê kompleksan fehm kena hem kî zaf babetan de gureyena. Mesela, merdim (mordem) ke vano “Xidirî rê telefon bike” ya kî “Waya mi rê telefon bike”, Sîrî otomatîk ê/a kesî/kese rê telefon kena ra. Agahîya rewşa hewayî, trafîk, termîn, serrname, gêrayîşê Înternetî, cayê restorant û sînema, wendişê mesajan ûêb. kî pê Sîrî benê. Jê (sey) nimûne, merdim (mordem) pers keno “Ewro şemsîya lazim a?”, Sîrî rewşa hewayî ra gore pêşnîyaza xo vana. Merdim (mordem) ke pers keno “Ewro karê mi zaf o?”, Sîrî goreyê termînanê qeykerdeyan cewabê xo dana. Sîrî hîna dewrê raverşîyayîşî der a, labelê nika ra bellî yo ke herînayoxê iPhone pê no fonskîyon zaf qayîl ê.
Resim: Apple
