Şirketê çîynermanê komputure Microsoftî webwendoxê xoyo neweyî Internet Explorer 9 vet. Nika ra xebitnayoxî şikînê IE9 biancê (bioncê) war. Bi no webwendoxo newe Mîcrosoft wazeno ke para xo ya pîyase ke bena vîndî, peyser bicêro.
Înternet Explorer 9 de tayê fonksîyonê neweyî estê. Barkerdişê Înternetî tenêna çapik beno û standardê neweyê muhîmî jê (sey) kodê HTML 5 yenê destek kerdene. Pê HTML 5 merdim (mordem) besekeno formatanê grafîkan jê (sey) Canvas, SVG û multîmedya jê (sey) Înlîne Vîdeo û Înlîne Audîo bar bikero Înternet.
Heto bîn ra IE9 de jê (sey) webwendoxê reqibî Mozîlla Firefox de kî ju (yew) managerê warantişan esto. Bi no fonksîyon xebitnayox besekeno ke xeylê warantişan paralel bianco (bionco) war, ya kî juyê (yewer) bibirno û tepîya reyna bixebitno.
Cêrayîşê Înternetî pê pencereyanê cîya-cîyayan Înternet Explorer 9 de tenêna bîyo asan. Pencereyê neweyî (“tab”) êndî otomatîk vejînê. Keyepelî kî pencereyan de kî bi renganê cîya-cîyayan bellî benê. No kî raver ra sirf reqib Fîrefox de estbî.
Merdim (mordem) ke Înternet Explorer 8 û 9 têverrono , vîneno ke IE9 daha lerze gurîno û performansê ey tenêna bîyo rind. Her çî ra raver gureyayîşê bi kodê JavaScript webwendoxanê bînan ra daha çapik o.
Pisporanê Înternetî ra gore Mîcrosoft na game ra para xo yê pîyase ancîya (onca) peyser cêno.
Seba warantişê Înternet Explorer 9: http://windows.microsoft.com/en-US/internet-explorer/downloads/ie-9/worldwide-languages
