Qiseykerdişê serekê partîya rastgire MHP Devlet Bahçelî ra tepîya Inegöl de kurdî amey hêrişkerdene. Qezaya Bursa yê Tirkîya de xeylê ban (bon) û erebeyê kurdan amey veşnayene û hetta çekî amey gurenayene.
Hêrişê serê kurdan nîya qewimîya: Roja 25.07.2010 saeta 21.30 de yew (ju) şoforê mînîbusî yo kurd hetê tirkêde nîjadperest ra ame vindarnayene. Ê tirkî ey ra vat ke reyna noca (naza) ra mevêro. Rayegirewtiş ra tepîya şoforê mînîbusî zaf giran ame pirodayene. Naye ra tepîya hîrê cêncê kurdî amey na taxe û şîy qewexaneyê tirkanê rastgiran ke uca (uza) de faşîzanê tirkan de bidê pêro. Uca de panc (ponc) faşîzanê tirkan bîy dirbetinî. Polîsî hîrê cêncê kurdî pêgirewtî berdî qereqol.
Na saeta ra tepîya Inegöl de rastgir û faşîzanan her ca de vatêne ke kurdan panc tirkî kardî kerdê. Nê qeseyan ser o hîrê hezar tirkî verê qereqol de amey pêser û waşt ke nê hîrê cêncan lînç bikerê. Uca de sloganê sey (jê) “PKK bimiro”, “Tîya (îta) Înegol o, noca ra vejîyayîş çin o” û “Şehîd nêmirenê, welat pare nêbeno” eştî. Ê kesan verê qereqolî de heşt tomofîlê polîsî veşnay û qereqol şanay kemeran ver. Naye ser o Bursa ra panzer û eskerî amey Inegöl. Polîsî seba xoseveknayîş çekan ra na hewa ra. Dima, hîrê hezar kesî şîy taxa kurdan “Taxa Huzurî”. Uca de banê kurdan rê kemer erzîyay, dikanî amey veşnayene.
Cêncanê kurdan kî Inegöl de raya Bursa û Eskîşehîr ca da. Înan va ke, “Ma xebere girewta ke xeylê tirkê faşîştî no şaristan ra yenê Înegol. Ma nêverdanîme ke ê bêrê Înegol, eke yenê her çî beno zaf xirabin”
