Inception: Fîlmo newe bi DîCaprîo

1

Fîlmo newe yê rejîsorê amerîkayijî Chrîstopher Nolanî (rejîsorê Batmanî yo) “Inception” (Destpêk) no hamnan hetê qayîtkerdoxan ra zaf ame hes kerdene û bîletê fîlmî sînemayanê xeylê welatan de bi hewteyan cayo 1. de mend. Merdimo (mordemo) ke fîlmê Inception zêde qayît bikero, êndî (êdî) ferqê rastîye û hewnî zor zaneno.

Kaybazo namdar Leonordo DiCaprio no fîlm de yew (ju) dizdê enfomasyonan bi nameyê Dom Cobbî kay keno. O şono bi teknolojîya newîye kûno zereyê hewnê însananê bînan û uca (uza) ra enformasyonê muhîmî, mavajîme sirê şîrketan ûsn. tireno. Rojê Dom Cobb yew (ju) siparîş fîrmaya japone ra cêno, wezîfeyê xo ra gore o bikûyo aqilê karmend û fabrîkator Robert Fîscherî ke pîyê xoyê rehmetî ra fîrmayêda girs a enerjî mîras girewto, mezgê ey henî têwerte bikero ke Fîscher dima bawer bikero ke rotişê fîrmaya xo fikrêde rind o. Yeno zanayene ke Cobb semedê kiştena cinîya xo besenêkeno ke peyser şêro Amerîka, feqet siparîskerdoxo japon ey ra soz dano ke eke no plan gureyeno, ey ancîya (onca) ano Amerîka. Cobb embazanê (alvozanê) xo dormeyê xo de keno top û dest bi karê xo keno. Naye ra tepîya fîlm biheyecan beno têwerte ro. Cinîya Cobbî ya rehmetî her şewe kûna hewnê Cobbî û planê ey maf keno. Gerek ke seyrkerdox rind qayîtê fîlmî bikero ke mezgê xo peynîye de kî têwerte mebo.

Rejîsor Chrîstopher Nolan sey rejîsorêde xeyalî yê fîlmanê macera yeno hesibnayene. Wextê xo de fîlmê serkewte û namdar “Batman Begins” û “Dark Knight” viraştîbî. Fîlmê Inceptionî bi 150 butçeyê mîlyon Dollarî ame antene (ontene), fîlm de heta peynîye biheyecan û balkêş maneno.  Fîlmêde macera bi estetîk, vîzyon û heyecan. Cayê ke fîlm ame an tene Tokîo, Parîs, Calgary, Mombasa û Los Angeles ê.

Inception yew fîlmo rind o ke serranê peyênan de ameyo çarnayene.

Inception (Destpêk)

Serre: 2010

Dergîye: 145 dq.

Welat: DYA, Îngilîstan

Rejîsor: Chrîstopher Nolan

Kaybazî:

Leonardo DiCaprio
Ellen Page
Joseph Gordon-Levitt
Ken Watanabe
Cillian Murphy

1 ŞÎROVE

  1. Wijer qayite filme Inception kerd ne. Hire cor saete tesire na film de mend ne. No film zof qayile mi si, viren ra hata peyniye ison nefese xo peyceno. Kamke nivito u filme hervi bi aksiyoni haskeno, no film serkero.

CEWAB BIDE

Keremê xo ra şîroveyê xo binuse
Keremê xo ra nameyê xo binuse