XİYALÉ ŞIMA ÇIK É?
Xiyal, çiyo ke mordem wazeno bı bo, hina nêbiyo, seba êy bıfıkıriyo, o xiyal o.
Waştiye, waşiyê xo wo ke duri de ro, êy xiyal kena.
Waşti, waştiya xo…
Kole, serbestiya xo xiyal keno, bındest, serdestiya xo..Dızd, çiyê ke wazeno bıtıro, inan xiyal keno, Ergenekon, derba ekseriye xiyal keno.
Waxto ke mı koyan de gege bı rojan bê wer, bê hewn mendêne, wer u hewn xiyal kerdêne. Rojê na vêşaniye ra dıme, rastê ju çemi biya, mı be destanê xo, dı masuyan vet, awe de şut, kal werd, zaf weş bi o waxt. Nıka masuyan kal nêwena, çı ke vêşan niya.
O waxt waştiya mı çini biye ke, ez waştiya xo xiyal bıkeri.
Waxtê xiyalê waştiyan nêbi, ba-bawo!
Adır bi serê mı de varêne.
Mı, o waxt zaf çi xiyal kerd, hama merdene xiyal nêkerd.
Merdene mı ra zaf nêzdi bi, çend raya gına mı ra, ez xelesiya ra.
Dışmeno zalım, merdena mı xiyal kerdêne, mı, mıradê inan nêkerd, ez nêmerda.
Ez rınd ke nêmerda heni niyo?
Hı hı hı…
Xxxx
Xiyalê meyitan çin ê, meyiti xiyal nêkenê, ma şıma?
Xiyalê şıma çık ê?
Keso ke xiyalê xo çino, mı ra duri.
Hobi u xiyali ju niyê. Hobi, xo ra bı kêfê şıma wo u şıma ebe ê kêfi kay kenê.
Kay, ê şıma wo, can ê şıma, aqıl ê şıma.
Doman şekır xiyal keno, kay xiyal keno, no hobi niyo.
Xeribiye de ra ez, ez welatê xo xiyal kena, no hobi niyo.
Hesrete xiyal o, xiyal hesrete wa.
De ma derg mekıme, welhasıl, derheqê xiyali de ma şıkinime zaf çi vacıme.
Ez şıma ra dı-hirê xiyalê xo vaci ke, wa dınya aleme ke bıheşêno, ya hunê, ya şaş manenê
Vacê ke ‘qey’.
Şıma nêvanê ke…
Ez vaci;
XİYALÉ MI, JU TELEVİZYONÉ MA BI BO, TENYA BI ZONÉ MA RA.
XİYALÉ MI, JU ROJNAMA MAYÉ ROJE BI BO, EZ HER ROJ A CA DE MAQALAN BINUSNİ
(Ez şıkina, beşe kena her roj ju maqale bı rehet zonê ma ra bınusni)
Nıka ez ke nê xiyalê xo kameji şari ra vaci, ya mı ra hunê, ya ecêb manenê.
Çı ke, na dınya de ju şaro ke bı zonê xo de televizyon u rojnameyê roje me bo, şarê de henên çin o, coka hunê.
Çoka ecêb manenê.
Heni niyo?
Xiyalê mı çıqas rehet o heni niyo?
Hama na ‘rehetiye’ hina seba ma çetın o çı hêf…
Nêzdiyê 17 televizyonê Kurdıstani est ê, hama zazaki ra ju televizyon çin o.
Naye bıfıkıriyê, şıma xiyalê mı fam kenê.
Ax… Xiyalê mın ê belengazi ax….
Şaşiya ma, kemasiya ma, qasê ‘baqılê ma’! zêdeyê.
Xxxx
Vındêêêê…Ez wayan u bırayanê xo ra vaci..
Galileoyi vat bı ke ‘dınya gılorek a’. Dindar u fanatikê ê waxti no fıkır ‘pırnıka Galieoyi ra ard bi’.
Gallileo qayt kerd ke nê ‘teresi’ fam nêkenê, va ke;
-BA-BAWO MI XORÉ LEQİ KERD
Hı hı hı..
Ma, Galillewo feqir se bıker o?
Ewro ju ehmaqo ke şıkino vaco ‘Galilleo neheq bi, dınya gıloreke niya’ mendo?
Nê…
Damawo Galileo…Pepuge to ra bıwano..
Xxxx
Mordem verde xiyal keno, dıme ra wazeno bıreso ê xiyalê xo. Mordem ke rest xiyalê xo, o xiyal, endi ‘xiyaliye ra’ vecino, beno rast. Rastiye de xiyal çin o. Xiyal de rastiye est a. Çiyo ke şıma nêşıkinê, çiyo ke endi nêbeno, xiyal mekerê, xo meqefelnê. Tawa nêbeno, canê şıma weş bo, ebe naye ‘pêniya dınya nêna’. İbrahim Tatlıses, ju filimê xo de, cayê de vano ke ‘xatır be to dınya! Ez me bi ki beno’.
Mı ki xo be xo va ke;
‘Meso İbrahim! Tı ke me bê, dınya bê to nêbena’!
Hı hı hı…
Xxxx
Çewlıg kewto mı vire Çewlıg.. Amed, Dêrsım kewto mı vire. Çewlıg, domantiya mı, Dêrsım, dılbera zerê mı, Amed, şuka zerê mı..Çı hêf ke, mı ebe mırdiya xo, ne domantiya xo, ne dilbera xo, ne şuka xo, nêcıwiya. No ki, mı ra ‘yadigarê na dınya puşte wo’.
Amed; Xençepek, Baxlar, şıma koti de rê?
Dêrsım; Xozat, çımê Muzıri, mısayib, kewra, şıma koti de rê?
Çewlıg; Karêr, çemê Muradi, awa xeyde, kursiyê qawan, çayê bı demi, şıma koti de rê?
Rayê waran, sayê daran….
Şıma koti de rê?
Ma ez? Ez koti de ra?
Xiyalê mı zaf xoriyê zaf.
Xiyalê mıyê ke, mı resna zonê ma, nıka ebe zonê ma şıma ra qal keno.
Coka ke mıradanê mı ra ju biyo, xiyalê mı ra ju biyo rast.
Wıle şıma bı zonê ma fam bıkerê-fam mekerê, mı ra xem niyo.
Keso ke zonê xa ra duriyo, zonê xo nêmıseno, ne xêr, ne ‘xêraz’ inan de çin o.
Xiyalê inan ‘xiyal’ niyo.
Her xiyal, zonê xo de bı mane wo.
Vacê ke heni niyo?
Mêrikan ‘xiyalê’ ma ki gırotê u kerdê ‘Hayal’.
Mêrıkan ma de çı nêgırotê ke…
‘Baqılê ma, ‘-Hayal-’ kenê, ez ‘Xiyal’ kena.
İyê ke ‘Hayal’ kenê, inan ra ju persa mı est ta;
Namê ‘Fıraqan’ Tırki de çık o? Qet xo meqefelnê, ‘Hayal’ mekerê, çı ke namê ‘Fıraqan’ Tırki de çin o.
İlhami Sertkaya
11-4-2010
