EŞQ MERD, ŞIMA WEŞ BÉ
Metersê, metersê..!
Eşqo ke ez qal kena, ‘eşqo çewt, eşqo zur o’.
O merd.
Mı, ê eşqê zurekeri ‘kışt’, zerê xo de vet.
O eşq, ‘eşqê inkari, eşqê asimilasyoni’ bi.
O ‘eşqo zuro ke’, zonê ma, ma ra duri kerd bi, kamiya ma, rastiya ma, heskerdena raste, ma ra duri kerd bi.
O eşqo ke, mordemi celladanê xo ra, dano heskerdene. O eşqo ke mordemi xapneno, seba letê non, kamiya mordemi gêno. Dıme ra, qalê ‘bıratiye’! keno, siyaset ra, deq u dolban çarneno. O eşqo ke mordemi seba ‘idarê xo’! beno ‘anıtqabir’ zuran veceno feke mordemi de. Mordem o ca de vano ke;
‘’Atam’ ala biraz qalx ben yatam’.
Çımê ‘Ata’yi kor bo..Ax ke ‘Ata mezele de ravastê u bıvatê ;
‘De madem çox istiyorsın, ê hadê ben qalxam, sen biraz yat ero’!
O waxt şıma vacê, no mordem se keno?
1- Ya vano, ‘’Oxx eferım, de hadê qalx ben yatam atam’!
2-Terseno vano ‘Wi pepooo! Nêro no hasar bi’!
3- Tersan ver ra remeno.
Kameji beno?
İxtimalê juyine, xo vir ra bıkerê.
İxtimale dıdı u hirine, zê namê mı rast o.
Ma, no handayê mordem qey xo xapneno?
Pere ba-bawo pere!
Eşqo zureker niya ro.
Zono zureker niya ro.
Mı no eşq kışt, resta eşqê xo, resta kamiya xo, resta zonê xo.
Wa, siyaset, ‘analiz-manaliz’! ê şıma bo, no eşq mı ra bes o.
Wa, ideoloji-mideoloji ê şıma bo. Teoriyê dergi, ‘Orta asyadan bir kısrak boyu gibi efendım..’ ê şıma bo.
Nazımo ke weşiya xo de qalê trajediye ma nêkerdo, wa ê şıma bo, mı ra lazım niyo.
Xxxx
Hama ez şıma ra çiyê vaci ‘mabênê ma de vındo’! kesi ra mevacê, heya?
Vacê ‘heya’.
Ne Mıkayil Aslan, ne o xorto ke ‘KURD 1’ de gege bı zonê ma proxram vırazeno, Deniz Gunduz, hina bınê tesirê mantıq u qompleksê Tırkan ra tam nêveciyê. Hina emekdaranê zonê ma, rınd fam nêkerdê. Deniz Gunduz, rojê bi bi mêymanê TRT 6 i. Spiker bı kurdi, êy ra pers kerd va ke;
‘Bı Zazaki rewşa helbestan u romanan çawaye? (Zazaki de halê helbestan u romanan çı tur o, senên o?)
Denizi, ebe kıjkek vênıtene va ke; ‘De helbes pırın, roman ji, yêk a mın, yêk ji a Munzur Çem’ nıvisiye’. Yanê (De helbesti zaf ê, roman ki, ju ê mı, ju ki Munzur Çem nusneno.Nê mordemeki zaf çiyanê binan va, yanê zaf çiyan nêva)
La-lawo-lawo-lawo…!
Nê handayê emekdaran u kıtabanê binan ke zonê ma de nusiyê, ‘mewe’. Mı cı ra ju e-mail ruşna, bê veng mend.
Şerm est o.Emekdaranê zonê ma ra tayê bı hurmetın vınde.
Ma bême Mıkayili..
Bême?
Wıle bême. Bême ke wa kami ke derheqê zon u emekdaranê zonê ma de qesi kerd, wa tayê bıfıkriyo, dıme ra qesi bıkero. Emekdarê zonê ma, kam beno bı bo, zaf bı qimetın ê. Mıkayil, ju roportajê xoyê Tırki de niya vano (Zazaca şiir yazan çok az insan var, yazanlar çoktur ama Kamer Söylemez gibi, Doğan Munzuroğlu gibi ağabeylerimizin yazdığı bu şiirler bizim sözlü halk edebiyatımızla korkunç bir şekilde örtüşüyor. Sizin yaptığınız bu eserler bizim halk mirasımızla örtüştüğü için onlar zaten kendi içerisinde müziğini taşıyor, onların müziğini yapmak çok kolay. Ben bazen Kamer’e söylüyorum; “Kamer senin şiirlerin bizim albümlerimizin en güzel şarkıları oluyor. Keramet sende mi bende mi anlamadım” diyorum. Tabii ki aslında keramet sizdedir.)
(Qa şıma Tırki rınd zanenê, hewca niyo ez bıçarni zonê ma ra)
Bıra, bıra, bıra…!
‘Goniya mı pıra’
Niya meke lo! Tenya ‘Kamer Söylemez’ çin o. Ma rınd ke tenya Qemer çin o. To ki zê Deniz Gunduzi, emeg u emekdaranê zonê ma ‘mewe’. Xo ra, nuskar u hunermendê zonê ma, zaf çin ê. Sed ra zêde kitabê helbesti est ê. Zaf ki weş nusiyê. Des ra zêde romani est ê. Ma, se bıkıme? O ke destê emekdaranê zonê ma ra yênê, handayê nıka. Qet ke nêbi, şıma na neheqiye mekerê.
Xxxxxxx
Offf..de mı qalê ‘eşqi’ kerdêne.
Yanê kılmek; eşqê zuri bıkışê, vecê zerê xo de. Bıresê eşqê rasti. Rast, eşq o, eşq rast o.
Eşqê ma, rastiya ma de ro.
Ez resta nê eşqi.
Coka ke mı ‘eşqo zur u zureker kışt’
O merd.
Şıma weş bê..
İlhami Sertkaya
4-4-2010
