Ez nıka zelal a, pak a, rastiya hezar seran a, resta kamiya xo, ma şıma?
Qılêr u qefçıliya inkari, deq u dolaban, ‘çep u rastê’ inkarciyan endi ebe mı nêşıkinê kay bıkerê.
Mırade mı bi!
Ez endi şıkina bımıri!
Xemê mı şımayê.
Şıma ra berbena ez.
Şıma ra, seba şıma berbena ez.
Mezga şıma de, hina xırabiya mantıqê inkari est o.
Fekê şıma de, zonê inkari.
Zonê şıma de, zonê ma vetê inkarciyan.
Şıma bınê tesirê derd u merezê zonê inkari de rê.
Mı inkar qedêna, resta zonê xo, mızgine kewte zerê mı.
‘Proje u mıroje’ yê zuran, ebe tira kamiya xo qedêna mı.
Ya bıresê rastiya xo, ya rastiya xo ra kay mekerê.
Şıma kam ê?
Zonê şıma çık o?
Edebiyatê şıma çin o?
Kulturê şıma, itiqatê şıma, rastiya şıma senên ê?
Namê welatê şıma, namê dewan u şukanê şıma est ê?
Şıma zonê xo ra nusnenê, qesi kenê ya, zonê binan ra?
Mı, nê persê ke şıma ra persa, verde xo ra persa.
O waxt ez rastê cuwabanê ‘biyene u vindi biyene’ ama.
Ebe nê persan, mı fam kerd ke, ez raya vindi biyene de ra.
A raye de veciya.
Raya rastiya xo ra gêra.
Raya rastiya mına ke inkarciyan mı ra xêli duri kerdê, mı fam kerd.
Veciya a raye ra.
Kewta raya rastiya xo.
A roje, mı vire ra nêşona.
Se ke, newe ra ama dınya heni bi, şıma naye fam kenê?
Na, mızgina mı, na, xezna mın a.
Ez resta xezna xo.
Mı inkar qedêna.
Resta rastiya xo, resta kamiya xo, resta şirıniya zonê xo.
Nıka serê na xezna de, zerê na mızgine de, şıma ra vana.
No veng, vengê rastiya ma, vengê kamiya ma wo.
Ez wazena çepero ke inkar u asimilasyoni, dormê mezga şıma de vırasto, weşaniyo, şıma vengê rastiya xo bıheşênê.
Kar u barê mı, no wo.
Bêrê nê bari, ma piya pare bıkıme.
Tawa nêbeno, ciya vindime, piya pare bıkıme.
No bar, ê ma piya wo
É ma wo, no kar.
Naye ra dot, her çi zur o, zur!
Bes o, xo mexapnê, mexapiyê.
MI İNKAR QEDÉNA, RESTA ZONÉ XO, EZ ENDİ ŞIKİNA BIMIRİ.
Newe ra biya doman ez, bê ters u xof qirena;
MA BE XÉR WELATÉ MI, ZONÉ MI, KAMİYA MI, MA BE XÉR!
Ez bınê adırê inkarciyan ra, zon u edebiyatê zurekeriye ra veciya, Çewlig! MA BE XÉR.
Ma be xêr, sodırê Karêri, şewê bê wayiri, rayê waran, verojê bê veng mendê, DERSIM, MA BE XÉR!
Çiçegê ke neqebê zerê mı de, ebe tofanê inkari pelax biyê; EZ AMA, MA BE XÉR!
Zaf herêy kewta, mı ef bıke zonê mı; MA BE XÉR!
Hata ke ez weş bi, şirıniya to, ebe xo çarnena xem meke zonê mı; MA BE XÉR.
Çeper u dêsa famkoriye şıknena, taritiya inkari serê to de vısnena, to kena zelal, dınya aleme ra wesênena.
Ez to, listan u dosyanê ‘Zonê ke sindorê merdene de rê’ vecena, kena rapor u dosyanê weşiye, xem meke.
Mı inkar qedêna, resta rastiya to, resta şirıniya to, xem meke zonê mı; MA BE XÉR.
İlhami Sertkaya
25-2-2010
