Domanê to, biyê ‘ser u bın’, bıberbe!
Xençerê inkar u asimilsyoni, domanê to, to ra duri kerdê. Domanê to, mektebê Tırkan de, mezgê xo de derba inkar u asimilasyoni werdê, bıberbe!
Nıka domanê to, ebe zonê asimilasyoni biyê ‘alım u malım’, ebe Tırki, xo ra, ma ra, to ra qalê ‘dendık u mendıkan’ kenê, bıberbe!
Ebe zonê Tırki, to ra leqe kenê, bıberbe!
Vengê berbeyena to, rengê to, xezebo ke amo serê to, xemê nê domanan niyo, bıberbe!
Bê, ma piya bıberbıme.
Ez to fam kena, tı mı fam kena.
Derdê ma piya wo.
BIBERBE CİGERA MI, BIBERBE!
Xêli waxto ke, ma qirenime, veng kenime, nusnenime, reca u dexelet kenime, nalenime, ‘kalenime’, lornenime, inkarci u asimilasyonci, ma ra hunê, domanê to, ebe ma kay kenê, xem nêkenê, nêheşênenê, nêwazenê vengê ma bıheşênê, bıberbe!
Derdê Pepuge, lêwê derdê ma de, çıko ke, tew!
Domanê to, biyê vıla, ebe zonê şari u dınya aleme ‘qaşo’ tı zen kena, barê dınya vılê inan de ro, ebe zonê Tırki danê to ra, ebe ‘enternasyonalizm’ danê kamiya to ra, bıberbe!
Ma ra berbayene menda, bıberbe!
Ma, vate u qirayene de, qesikerdene, u dexeletan de qefeliyayime, bıberbe!
Bıberbe, beno ke wijdan u meramet bêro zon.
Bıberbe, eşq zelal bo.
Bıberbe, feleğe u domanê to, beno ke şerm bıkerê.
Bıberbe, şerm, ‘şerm bıkero’.
Bıberbe, beno ke qelemi, kaxeti, kıtabi, qalê to bıkerê, hal u merhalê to, derd u xezebê to, rastiya to bıkero ‘çımanê domananê’ to.
Lilıke çımê famkoran derışiyo, bıberbe!
Gılê koyan bılerzo, kılê çıman şuka zerê to bıwano, bıberbe!
Guna to, vılê inan de ro bıberbe!
Jariya to, deca to, pêrişaniya to, wa ‘hardê zerê inan’ bılerzno, bıberbe!
İnkarciyan u edebiyatê inan, domanê to kerdê ‘Tırk u Tırkbaz’ bıberbe!
Rastiya to, kamiya to, ebe edebiyatê Tırki pê kar anê, bıberbe!
Pêrişaniya to, kenê malê edebiyatê Tırki, to, ebe edebiyatê tırki xendeqnenê, bıberbe!
Pırodayene, qetılbiyene, vêşíyaye, qederê ma, bınê lınganê inan de mendo, berbayene ma ra menda, bıberbe!
Domanê toyê ke, rastiya to ra vısiyê, to fam nêkenê, nêwazenê fam bıkerê, bıberbe!
Verba na mıxenetiye ra vınde, bê wayirtiya xo ra bıberbe!
Ebe Tırki vanê ke ‘Ana dilimiz’!
‘Ana’ nêmenda, ‘Dil’ pêrişan o, bıberbe!
Domananê xo ra u halê xo ra bıberbe!
BIBERBE ZONÉ MI, BIBERBE!
İlhami sertkaya
20-2-2010
