Hozan Vîcdanî roja 12.07.2010 dinyaya xo vurnaye. Ey xeylê wext kanserê qirrike ra antîbî (ontîbî) û nêweşxane de bîyo. Na nêweşîya ra besenêkerd ke xo ser o bêro û Hamburg de sereyê xo (sareyê xo) na ro. 11 serrî Hozan Vîcdanî nêweşxane de bî û uca (uza) de têlê xo yê vengî ameybî birnayene. No semed ra Vîcdanî êndî (êdî) besenêkerd ke derdê xo yê zerrî ey bîyaro ziwan (zon). Aye ra tepîya ey bi (ebe) qelema xo şîîrê xemgînî û welatperwerî nuştê.

Hozan Vîcdanî bi nameyê xoyo rastî Zeynel Abîdîn Sonmez serra 1941 de Mereş de ame dinya. Emrê xo yê 70serre de 500 şîîrî û bi desan kasetî viraştî. Xeylê albumê ey hetê dewleta Tirkîya ra amey qedexekerdene. Qirkerdena Mereşî de kî Hozan Vîcdanî uca bî. No qirkerdiş de 16 xisimê xo kerdîbî vîndî. Hozan Vîcdanî bi nasnameyê xoyo elewî û çepgirî xeylê reyî kotîbî hepisxane û zaf îşkence dîbî. Lajê (lazê) Hozan Vîcdanî sey (jê) gerîlla merdo. Yew (ju) çênaya (kênaya) xo hîna koyan de seba welatê xo sey gerîlla lej kena.

Nêzdîyê 20 serran ra ke Hozan Vîcdanî weşîya xo Hamburg de ramitêne. Xebera merdena xo ser o kurdanê Hamburgî zaf kot ver, bîyê mirozin. Roja 13.07.2010 de xisim û hevalê ey meyîtê ey ser o komela kurda almane de amey pêser. Dima tabuta Hozan Vîcdanî rusîyaya welatê xo Mereş.

Şîîranê Hozan Vîcdanî de hesreta welatî zaf yena ra ziwan:

“(…)
Êyê ke barê xo eşq o, nêqefelînê
Êyê ke bêwelat ê, derdê xo pers nêbeno
(…)”

Hozan Vîcdanî vato ke heta pancserrîya xo (poncserrîya) xo keyfê xo ca de bî, labelê tepîya dej û îşkenceyêde girs dîy. Qirkerdişê Mereş ser o Vîcdanî dejê xo nîya nuşt:

“Va ke bêrê pîzeyê cinîyan raqilasnê,
va ke nê kurd ê, komunîst ê, pêro dê,
va ke şêrê îşkence ra pers bikerê,
gonîya sûre bîya laser şîye Mereş de…
domanê qijî kerd tîrî ra,
huyay huyay tey nîyaday,
çi ke ame xo dest, o veşna
gonîya sûre bîya laser şîye Mereş de…”