Hukmatê Hîndîstanî wazeno ke muhtewaya medyaya sosyale jê (sey) Facebook û Twîtter tenêna çîp bêro kontrol kerdene. Waştişê hukmatî ser o 100 mîlyon xebitnayoxanê Înternetî yê welatî protesto kerd û va ke hukmat ceribneno ke Înternet sansur bikero.

Roja dişemîye wezîrê enformasyonî yê Hîndîstanî Kapîl Sîbalî bi temsîlkaranê Facebook, Google, Mîcrosoft û Yahooyî ame têlewe ke nê şîrketê Înternetî resim û vateyanê xo ke ro qenaetê hukmatî nêşikînê, pak bikero. Şîrketan waştişê hukmatî red kerd.

Sebebê waştişê zêde kontrolî protestoyê şarî yê aşma tebaxe bî. O taw şarê Hîndîstanî duştê rişwetwerîya sîyasetkaran de protesto kerdîbî, no protesto kî bi ardimê medyayanê sosyalan ra bîbî pêt. Badê ke nê skandalî ameybî eşkera kerdene, bi des hezaran însanî rayan ser o bîy, peynîye de hukmatî mecbur mendîbî ke qanûnê xo duştê rişwetwerîye de bivurno bikero tenêna çîp.

Par kî dewleta Hîndîstanî viraştoxê telefonanê destanê Blackberry RÎM ra waştîbî ke ê sîstemê xoyo nimite yê e-maîlan eşkera bikerê ke wa terorîstî pê nê sîstemî besenêkerê dizdî ya karê xo biramê. Goreyê Sîbalî aksîyono nikayin ra ehlaqo kulturî bêro seveknayene. Ey ra gore waştişê hukmatî sansur nîyo.

Duştê naye de xebinayoxê blog û rîpelanê komelkîyan ê demokrasîya tewr girs a dinya vanê ke fîltrekerdişê neşrîyatanê Înternetî pê heqê azadîya fikrî rîayet nêkeno. Aye ra kî dot pisporî danê zanayene ke hetê teknolojî ra mumkîn nîyo ke ju (yew) program Înternet goreyê muhtewaya bêehlaqe saye bikero.

Hîndîstan de xebitnayoxê Înternetî hema-hema serbest ê, her kes besekeno cikuyo. Labelê çimê hukmatî medyaya sosyale de esto. Rîpelê jê (sey) Facebook, Twîtter ya kî blogê Înternetî benê enstrumanê zaf pêt. Wisarê ereban de, mesela, medyaya sosyale rolêde muhîm girewt.