Heyetê Partîya Yewîya Demokrate (PYD) ya Kurdîstanê Rojawanî bi temsîlkaro taybetî yê Miletanê Yewbîyayeyan (MY) seba Sûrîye, Staffan de Mîsturayî de ame têlewe. No kombîyayîş parçeyê rojeva muzakeranê Cenevre bî ke PYD resmî tey beşdar a.
Mîstura û çarna kesê heyetê xo bi hemserekê PYD Salîh Muslim, temsîlkarê PYD yê Ewropa Adbulselam Mustafa û spîkera PYD Sînem Muhammed de ofîsê MY yê Cenevre de ame têlewe. Mewzûyê kombîyayîşî qedênayîşê cengê Sûrîye bî.
Muslimî kombîyayîş sey pozîtîf ercna, va ke kombîyayîşê nîyanênî seba çareserkerdişê rewşa sîyasî ya Sûrîye muhîm ê. Muslimî ra gore, temsîlkarê MY va ke sîstemê Kurdîstanê Rojawanî nimûyêde demokratîk seba Sûrîye yo. Boyna, heyetê PYD giranî da cengê YPG verba çeteyanê “Dewleta Îslamî” (DÎ). No ceng tena cengê kurdan ney, cengê pêro însanan o.
Goreyê hemserekê PYD ra, cengê zereyî yê Sûrîye de rolê kurdan muhîm o. Seba Sûrîye çareyo demokratîk lazim o ke pêro însanî tede temsîl bibê. Pêşnîyaza PYD a ke MY nê bingeyî ser o stratejîya xo bivirazo. Melumatan ra gore selahîyetdarê MY muzakerê xo bi muxalefetê Sûrîye, PYD tede, dewam kenê.
