Hewlêr û Bexdad hîna derheqê îxracatê petrolî de nêamey werê. Goreyê xebera Rûdawî qiseykerdoxê Hêrema Kurdîstanî Safên Dîzayêyî da zanayene ke derheqê îxracatê petrolî bi Tirkîya û welatanê bînan de hîna peymana bi hukmatê Bexdadî çin a.

Nê vatişê Dîzayêyî cewabê şîroveyê wezîrê enerjî yê Îraqî Huseyîn Şahrîstanî yo ke roja şemîye vatîbî ke hukmatê Herêma Kurdîstanî û hukmato federal ê Îraqî no mewzû ser o ameybîy werê. Hukmatê Îraqî israr keno ke pêro ameyeyê îxracatê petrolî hetê Bexdadî ra bêrê îdare kerdene. Heto bîn ra kurdî vanê ke hem îxracat hem kî ameyeyê nê îxracatî mesela Herêma Kurdîstanî ya.

Seba ke kurdan ser teda hîna zêde bo, serekwezîrê Îraqî Nurî al-Malîkî Herêma Kurdîstanî butçeyê dewlete ra birnaye. Serekê Herême, Mesûd Barzanî, va ke no yeno manaya îlanê cengî. Barzanî ra gore heqê kurdan o ke ekonomîya xo bi xo îdare bikerê.

Xeberan ra gore temsîlkarê Îraqî û yê Kurdîstanê Başûrî do bêrê têlewe ke na mesele hel bikerê. Vanê, hukmatê Îraqî qebul kerd ke pereyê maaşanê karmendanê Hewlêrî bido. Labelê her di hetî hîna yewbînan de zerrîpêt manenê.

Genel Energy, şîrketê petrolî yo anglo-tirk, da zanayene ke o emser 50% zêde petrolî Kurdîstanê Başûrî ra paweno. Şîrketo ke Herêma Kurdîstanî de vetoxo tewr girs ê petrolî yo, bawer keno ke mesela Bexdad û Hewlêrî çareser bena û coka îxracatê Kurdîstanî paweno.

2 ŞÎROVEYÎ

  1. Çîyo tewr muhim o yo ke, başur resto statuyê xo. Çîyê bînî, tengasîyê bînî, vêrenê, kes xem mekero.

  2. çi îş o ke erebî ma rî vanî ma welatê xo de se kerîm û se nêkerîm? Iraq ra xeyr-meyr çinî yo ma rî, xo mexapnin! Heke î vanî butce ra pere şima rî çinî yo ma zî pere nêdanî îno. Ewca Iraq Miraq nîyo Kurdistan o!!!

Comments are closed.